"Ginnesin Rekordlar Kitabı"na düşən azərbaycanlı: “Vallah, bunu futbolçular seçib"
Region Liqasının yeni komandalarından biri də "Bərdə"di.
Debütantın diqqəti çəkməsinin daha bir maraqlı səbəbi var. Aran təmsilçisi İspaniyanın məşhur klubu "Atletiko"nun emblemindən istifadə edib. Həvəskar liqada çıxış edəcək komandanın belə addım atmasının səbəbi nədi? Həm bu suala cavab tapmaq, həm də klub haqda məlumat almaq üçün bərdəlilərin baş baş məşqçisi Əli Quliyevə əlaqə saxladıq. Onun "Football-plus.az"a dedikləri:
"Artıq 3 aydı komandanı yığırıq. Bilirsiz ki, 12 ildi Bərdə futbolsuzdu. Rayon İcra Hakimiyyəti bir dəfə də bizlə maraqlanmayıb, deməyib ki, bunlar nə iş görür. Köhnə rəhbər İlham Ağayev gözəl adam idi. İndikinin yanına futbolla bağlı söhbətə getmək olmur. Çünki idmanı sevən adam deyil. Mən özüm də keçmişdə futbolçu olmuşam. 53 yaşıma kimi oynadığım üçün "Ginnesin Rekordlar Kitabı"na düşmüşəm. Heyəti tam qurmuşuq. Hamısı rayon uşaqlarıdı. Bir nəfər əslən tərtərlidi, ancaq Bardədə qalır. Sponsor məsələsinə gəlincə, rayonun Ağsaqqalar Şurası bizə kömək göstərir. Bir də Əli Şərifov yardım göstərir. Onlara da təşəkkürümü bildirirəm. Stadionumuzun ot örtüyü yaxşıdı. Sadəcə, məcburi köçkünlər tribunalardakı oturacaqların bəzilərini sındırıblar".
Əli bəy loqonun "Atletiko"dan oğurlanması sualına da belə cavab verdi:
"Vallah, bunu futbolçular seçib. Onlar bəyəndikləri üçün mən də heç nə demədim. Biz istəyirdik ki, köhnə loqonu qoyaq, ancaq uşaqlar dedilər ki, yenisi olsun".
CAVİD ƏLİYEV
Digər xəbərlər
