Bu gün Zirədə eyniadlı komanda "Araz-Naxçıvan"ı qəbul edir.

Tərəflərin turnir cədvəlində fərqli pillələrdə qərarlaşmasına, hətta "qartallar"ın nisbətən daha yaxşı mövqedə olmasına baxmayaraq, rəqiblərin oxşar tərəfləri, zəiflikləri çoxdu. İlk növbədə onu vurğulayım ki, həm zirəlilər, həm də naxçıvanlılar oyun planında üstün olsalar da, uğursuzluq zolağındadılar və qələbəyə həsrətdilər. Muxtar Respublika təmsilçisi son 4, "Zirə" isə son 2 oyunda 3 xal görməyib. Halbuki buna qədər ikisi də uğurla irəliləməkdəydi.

Bu gün keçiriləcək oyun komandaların iddialarına müəyyən ölçüdə aydınlıq gətirəcək. "Qartlallar" bu görüşdə də məğlub olsalar, nəinki 2-ci, hətta ilk "3-lük"də yeri də qorumaq çətin olacaq. Çünki arxadan "Səbail", "Sabah", "Neftçi" gəlir. 1-ci dövrədə vacib xallar itirən “bayquşlar” çempionatın 2-ci yarısında daha amansız olacaq. Murad Musayevin iddiası, əlinin altında səviyyəli futbolçuların yer alması və uğursuzluqlardan dərs çıxarması belə güman etməyə əsas verir. Odu ki, "Zirə" bu matçla yanaşı, qış fasiləsi ərəfəsindəki daha iki görüşdə maksimum çox xal toplamalıdı.

"Araz-Naxçıvan"ın qarşısına avrokuboka vəsiqə qazanmaq hədəfi qoyulmasa da, komanda autsayder olmaq niyyətində də deyil. Baş məşqçi Azər Bağırov da çıxışlarında dəfələrlə vurğulayıb ki, yaxşı oyun sərgiləməklə bacardıqca irəli getmək istəyirik, amma avrokuboklara vəsiqə qazanmaq kimi hədəfimiz yoxdu. Gənc mütəxəssisin sözlərində yalan yoxdu. Amma və lakin...

Komanda 3-cü turdan sonra sərgilədiyi oyun və nəticələr ilə göstərdi ki, boyundan hündür tullana bilir. Yəni avrokubok hədəfi qoyulmayıbsa, bu o demək deyil ki, irəliləyiriksə və həmin turnirə vəsiqə verən yerləri götürmək iqtidarındayıqsa, bundan istifadə etməyək. Düşünün ki, bir tələbəyə hansısa fəndən test imtahanı verən vaxt “3” almaq bəs edir. Amma imtahan suallarına göz gəzdirdikcə anlayır ki, çoxunun cavabını bilir. Belədə yalnız “3” almaq üçün masa arxasına əyləşmək və bildiyin cavabları yazmamaq, sadəcə, axmaqlıqdı. Eynən Azər Bağırov da geridə qalan 15 turda həm çempionatın atmosferini tutub, həm də komandasının güclü-zəif tərəflərini təhlil edib. Sadəcə, naxçıvanlıların hücuma daha çox aludə olması və komanda şəklində yaradıcı oyuna üstünlük verməsi müdafiəni yaddan çıxarıb. Müdafiənin mərkəzində də ciddi problemlər var. Bu nöqsanlar aradan qaldırılmaq şərti ilə indiki kreativ futbol davam etdirilsə, Azər Bağırov imtahandan “3” alan tələbə olmayacaq.

Xülasə "Araz-Naxçıvan" bu gün Zirə səfərində ən azı uduzmamalı və qarşıdakı iki görüşdə qələbə qazanmaqla qış fasiləsinə rahat yollanmalıdı.

ABDULLA İSMAYILOĞLU