Bazar günü keçirilən oyunda “Atletiko”nun, yəni sabiq komandasının qapısından qələbə topunu keçirən “Barselona”nın yarımmüdafiəçisi Joao Feliş jurnalistlərlə söhbətdə belə demişdi:

“Hər həftə haqqımda danışırlar, həmişə diqqət mərkəzindəyəm. Sakitəm, başqalarının danışıqlarına fikir vermirəm. Futbolçu kimi daha yaxşı olmağa çalışıram. “Atletiko”dan olan sabiq komanda yoldaşlarımın, demək olar ki, hər biri ilə münasibətlərimiz yaxşıdı, mənim onlarla heç bir problemimin olmadığını bilirlər. İstərdim ki, “Barsa” mənlə müqavilə bağlamaq üçün mümkün olan hər şeyi etsin, burda xoşbəxtəm”.

Feliş avqustdan, yəni icarə əsasında Kataloniya klubunun şərəfini qorumağa başlayandan bəri 17 oyunda 8 qol vurub. Onu daimi əsasda transfer etmək ilk növbədə qiymətinə görə çətin olacaq. Ancaq bəzi bilgilər də var ki, “Barsa” bu yolda hər şeyə hazırdı. “As” nəşrinə inansaq, portuqaliyalı ulduzun seçimi Kataloniya nəhəngindən yanadı, o, “hindular”ın düşərgəsinə dönmək istəmir. “Blauqrana”nın rəhbərliyini narahat edən yeganə məqam onun heç də həmişə eyni səviyyədə oynamamasıdı, yəni Felişin parladığı qarşılaşmalarla yanaşı, kölgədə qaldığı anlar da olur.

Joaonun “Atletiko” ilə oyunda vurduğu qoldan sonrakı jesti də İspaniyada böyük maraq doğurub. Xatırladaq ki, o, reklam lövhələrinin yanına qaçaraq əllərini yana geniş açmışdı. Bu jest sizə kimisə xatırlatdımı? Heç şübhəsiz, Cud Bellingemi. “Real”ın ingiltərəli ulduzu da qollarını belə qeyd edir.
Həmkarlarımız Felişdən qolu niyə məhz belə qeyd etdiyini də soruşublar: “Qola reaksiyam spontan idi. Oyunun gərginliyini yaşayırsan. Və bu şəkildə qolu qeyd etməyim yayda yaşadıqlarıma görə müəyyən yüngüllük hissi keçirməyimin ifadəsi idi. Yalnız mənə yaxın olan adamlar ailəmlə birgə bu mərhələni necə arxada qoyduğumu bilirlər”.

Cudla Joaonun jestlərinin oxşarlığı “Cadena SER” nəşrində çalışan həmkarımız Tomas Ronseronu necə ruhlandırıbsa, böyük bir nəzəriyyə icad edib. O əmindi ki, Bellingemin qol sevincini təkrarlayan portuqaliyalı “Real”a keçmək arzusunu ictimaiyyətə çatdırır.

Ronsero bu dəlilləri “El Bar” verilişinin efirində bölüşüb: “Feliş hələ “Benfika”da olanda Jorje Mendeş deyirdi ki, müştərisi “Real”a qovuşmaq istəyir. Joao Madriddə oynamağı arzulayırdı. Hətta Mendeşə demişdi ki, məni “Santyaqo Bernabeu”nun yanında saxla. Məhz buna görə agent futbolçunu “Atletiko”ya apardı. Əlbəttə, sonuncu qol sevinci Dieqo Simeone ilə bağlı intiqam aktı idi, ancaq Feliş bu jestdə “Real”la bağlı duyğularını da dilə gətirdi. Futbolçu “Real”ı gözləyirdi, ancaq madridlilər onun arxasınca getmədi, bu üzdən qol sevincini belə qeyd etməklə sanki hansısa tələb irəli sürür, “Real”ın diqqətini çəkməyə çalışır. Feliş Bellingemin bir neçə həftə əvvəl “el-klasiko”da qolu necə qeyd etdiyini görüb və öz-özünə deyib ki, baxın, mən də belə edəcəm. Bu jest Florentino Peresə müraciət idi”.

Yəqin həmkarımızın fantastik janrda yazılan kitablar üçün yarayan fikirləri sizi təəccübləndirdi. Onda Ronseronun daha bir nəzəriyyəsini xatırladaq: guya Qrizmann da karyerası boyunca “kral klubu”nun şərəfini qorumağı arzulayıb. Nəhayət, bunu da deməyin vaxtıdı: həmkarımız “Real”ın böyük fanatıdı. Futbolçuların sirli arzularını gün işığına çıxarmaq cəhdi axmaqlıq kimi görünür. Ona qalsa, Joaonun “Barselona”dakı təqdimat mərasimində göz yaşı axıtmasından da belə məna çıxarmaq olar ki, futbolçu sevimli klubu ilə rəqabət aparan kataloniyalıların şərəfini qorumağı bir o qədər arzulamırmış.

Ümumiyyətlə, İspaniyada portuqaliyalı ulduzun personasına münasibət birmənalı deyil. Əsasən “Valensiya”nın heyətində çıxışı ilə tanınan sabiq qapıçı Santyaqo Kanisaresin fikirləriylə tanış olun: “Joao həmişə özünü ortaya atır. Mən Joaonu xarakterinə görə o qədər də sevmirəm, çünki o, özünü başqalarından üstün sayır, hərçənd özü futbolda az şey qazanıb. Buna baxmayaraq, mən onu çox istedadlı futbolçu hesab edirəm. İllər keçdikcə təvazökarlıq qazanacaq və onda biz ən yaxşı Joao Felişi görəcəyik. Bütün oyun modellərinə hörmət etmək lazımdı. “Atletiko”nun sistemi komandaya titullar qazandırıb. Səni Avropa futbolunun elitasına gətirən komandaya minnətdar olmağa dəyər. Səni olduğundan daha güclü edən komanda ilə düşmənçilik etməyə ehtiyac yoxdu”.

Maraqlıdı...
“Movistar Plus”un X (keçmiş “tvitter”) hesabında maraqlı video yer alıb. Həmin videoda Felişin “Atletiko”nun müdafiəçisi Xose Ximeneslə münaqişəsi görünür. Uruqvaylıya baxan portuqaliyalı deyir: “Vur məni, vur məni”. Ximenes isə belə cavab verir: “Hə? Dalaşmaq istəyirsən?”

Araya girən Koke komanda yoldaşını sakitləşdirir: “Görmürsən ki, o, sənin ikinci sarı vərəqəni alıb qovulmağını istəyir? Sakitləşmək lazımdı”.