“Qarşıda bizi qısa müddət ərzində çətin oyunlar gözləyir. Bu matçlara ən yaxşı şəkildə hazırlaşmağa çalışırıq. Üzərimizdəki məsuliyyətin fərqindəyik və yığma fasiləsində çox yaxşı çalışdığımızı düşünürəm. Mövsümə yaxşı başladıq və uzun bir qələbə seriyası yaxaladıq. Sonradan bəzi qarşılaşmalarda büdrədik ki, bu da normaldı. Futbolda belə şeylər olur. Gah qalib gəlirsən, gah da məğlub olursan. Yenidən qələbə seriyası yaxalamağa səy göstərəcəyik. Düzdü, rəqiblər bizə qarşı motivasiyalı oynayır. Bəzən bizə problem yarada bilirlər. Amma “Fənərbaxça” rəqibdən asılı olmayaraq hər oyuna qələbə üçün çıxır. Belə ağır təqvimdə həm fiziki, həm də psixoloji cəhətdən hazır olmalısan. Hazır olmadıqda oyunlar ardıcıl olduğu üçün müəyyən problemlər yaşaya bilirsən. Peşəkar futbolçu hazırlığına da, istirahətinə də fikir verməlidi. Üç gündən bir meydana çıxdığımız üçün istirahət zamanını da düzgün seçmək lazımdı. Orqanizm mütləq toparlanmalıdı və bundan sonra növbəti oyuna hazırlaşmalısan. Burda 3-cü ilimi keçirirəm. Açığı, bu mövsüm əvvəlki illərdən fərqlənir. Çünki heyətimizdə təcrübəli, istedadlı, adlı-sanlı futbolçu çoxdu. Onların sayəsində komandanın səviyyəsi də artıb. Söhbət təkcə fərd olaraq ulduzlardan getmir. Bu oyunçular həm də komandadakı ab-havaya müsbət təsir göstərirlər, əllərindən gələni edirlər. Yəni biz ayrı-ayrı oyunçular baxımından yox, kollektiv şəkildə güclüyük. Bir futbolçu oynamaq şansı qazandıqda özünü daha inamlı hiss edir. Baş məşqçimiz mənə bu şansı verir. Şans qazandığım matçlarda faydalı ola bilmək üçün əlimdən gələni edirəm. Amma bilirəm ki, bundan da yaxşı oynamağa qadirəm. Düzünü desəm, Türkiyə məni yaxşı mənada təəccübləndirdi. Çünki bura gəlmədən öncəki düşüncələrimlə indiki düşüncələrim arasında yerdən göyə qədər fərq var. İstanbul möhtəşəm şəhərdi. İnsanları da çox istiqanlıdı. Xaricdə yaşayıb buranı görməyənlər Türkiyənin necə ölkə olduğunu bilmirlər. Mən də bura gələrkən pozitiv mənada Türkiyənin belə gözəl ölkə olduğunu bilmirdim. Ailəmlə birlikdə burda çox xoşbəxtəm. Daha çox evdə zaman keçirməyə üstünlük verirəm. Amma bəzən restoranlara, ziyarət ediləcək yerlərə də gedirəm. Küçədə insanlar bizə qarşı çox yaxşı davranır. Sonda fanatlarımıza demək istəyirəm ki, bizə güvənsinlər və dəstəklərini çəkməsinlər. Çempionluq bizim olacaq. Buna həqiqətən də hər birimiz ürəkdən inanırıq və bunun üçün çox çalışırıq. Qarşıdakı çətin oyunlarda fanatlarımıza çox ehtiyacımız olacaq. Ümid edirəm ki, sonda onların da dəstəyi ilə əsas hədəfimizə çatacağıq”.