Dünya futbolunda zatən bir çox rekordun sahibi olan ''Qızıl top''un səkkizqat qalibi Lionel Messi daha bir göstəricidə rekordu yeniləyə bilər.

"Football-plus.az" xəbər verir ki, məsələ burasındadı ki, onun ötən il dünya çempionatı zamanı Argentinanın heyətində geydiyi formalar hərraca çıxarılacaq. Konkret olaraq söhbət Leonun Səudiyyə Ərəbistanı, Meksika, Avstraliya, Niderland, Xorvatiya və Fransaya qarşı oyunlarda geydiyi ümumilikdə 6 formadan gedir. Bir formanın təxminən 10 milyon dollara satılacağı gözlənilir! Bu, baş versə, forma satışı baxımından rekord qeydə alınacaq. Argentinanın digər əfsanəsi Dieqo Maradonanın da Argentinanın zəfəri ilə başa çatan DÇ-1986-nın 1/4 finalında geydiyi forma hərraca çıxarılmışdı. Kimliyi bilinməyən bir şəxs həmin formaya 8 milyon avro ödəmişdi. Hazırda rekord isə Maykl Cordana məxsusdu. Bütün idman növləri arasında ən baha qiymətə satılan atribut ona məxsusdu. Belə ki, bir müddət öncə əfsanəvi basketbolçunun 1984-cü ildə ''Çikaqo Bullz''un heyətində geydiyi bir cüt idman ayaqqabısı 8,1 milyon dollara satılmışdı.

ƏLİ