Futbol üzrə ölkə çempionatının 1-ci liqasında elitaya yeganə vəsiqə uğrunda gərgin mübarizə gedir.

Çempionluğa idialılardan "Şamaxı" heyətinə görə seçilir. Belə ki, bölgə təmsiçisində elita təcrübəsi olan oyunçular yetərincədi. Amma "şirlər"in heyətində Elşad Tağıyev parlayır. O, ilk 8 turda 8 qol vurmaqla həm komandasının, həm də çempionatın bombardiridi. Futbolçuyla "Şamaxı"ya keçidi, qarşısına qoyduğu məqsədlər ilə bağlı söhbət etdik. 

- Əvvəlcə futbola gəlişindən danışardın...
- Futbola 8 yaşımda doğma rayonumuz Tovuzda başlamışam. Futbolçu olmağım istiiqamətində ailəm həmişə dəstək verib. Futbolun sirlərini Vəkil müəllimdən öyrənmişəm. 

- "Şamaxı"ya keçidin necə baş verdi?
- Ötən il "Neftçi"dəydim. Orada yaxşı mövsüm keçirsəm də, elə oldu ki, klubdan ayrıldım. Mənə 1-ci liqadan çox təklif var idi, düzgün qərar verməliydim. Sonda seçimimi "Şamaxı" üzərində saxladım. Çempionluğa oynaması da bölgə təmsilçisini seçməyimdə əsas rol oynadı. 

- Ucaboy, hər iki ayaqla oynamağı bacaran gənc oyunçusan. Belə fiziki xüsusiyyətlərə sahib olduğuna görə özümü şanslı sayırsanmı?
- Ucaboy olmağım və hər iki ayaqla oynamaq mənim üçün üstünlükdü.  Çalışıram bu üstünlüklərdən maksimum istifadə edim. Ümid edirəm ki, daha çox qol vurmaqla və ötürmə verməklə komandam üçün faydalı olaram. 

- Hazırda "Şamaxı"nın və 1-ci liqanın bombardirisən. Mövsümün əvvəlində qarşına çempionatın ən sərrast futbolçu  olmağı məqsəd qoymuşdunmu?
- Kluba gələndə qarşımıza çempionluq hədəfi qoyuldu. Mənim üçün bombardir olub-olmamağın çox da önəmi yoxdu. "Şamaxı"nın çempionluğu bombardir olmağımdan üstündü. Ona görə də "şirlər"in mövsümün sonunda birinci olması üçün əlimdən gələn hər şeyi edəcəm.

- "Şamaxı" zəngin tarixə malik, premyer-liqada və avrokuboklarda çıxış edən klubdu. Bu komandada oynamaq sənin üçün nə deməkdi?
- Yayda başqa klublar da mənlə maraqlanırdı, dediyiniz kimi, tarixinə, ötən il elitada olduğuna və yenidən ora qayıtmağı hədəf seçdiyinə görə "Şamaxı"nı seçdim. Komandamın elitaya çıxması üçün bütün gücümü səfərbər edəcəm. 

- "Şirlər"in heyətində elita təcrübəsi olan futbolçu çoxdu. Bunu özün üçün əlavə motivasiya, stimul sayırsanmı?
- 10-12 oyunçumuz ötən mövsümdən komandada çıxış edənlərdi. Onların premyer-liqa təcrübəsi var. Baş məşqçimiz Vüqar müəllim də ötən mövsümdən "Şamaxı"dadı. Həm məşqçilər heyəti, həm də təcrübəli futbolçulardan yararlanmaq mənim xeyrimədi. Öz oyunumu yaxşılaşdırmaq üçün də əlimdən gələni edirəm.
 
- Ümumilikdə cari mövsümü necə qiymətləndirərdin?
- Mövsüm çox gərgin başlayıb. İndiki durumda daha çox xal qazana bilərdik, bəzi oyunlarda bəxtsizlik öz sözünü dedi. Bu mövsüm, demək olar, asan rəqib yoxdu, bütün komandalar meydanda vuruşur, xal və xallar qoparmağa çalışır. 

- Sənə görə çempionluq yolunda ən çətin rəqibləriniz hansıdı?
- Hansısa komandanın adını çəkmək düzgün olmaz, biz hər oyuna qələbə üçün çıxırıq. Turnir cədvəlinə də baxsaq, görürük ki, xal fərqi azdı. Yuxarıda vurğuladığım kimi, bu mövsüm daha ciddi rəqabət var. 

- Necə düşünürsən, çempion olub elitaya qayıda biləcəksizmi?
- Məqsədimiz yenidən premyer-liqaya qayıtmaqdı. Hələ qarşıda çox oyun var, hər oyuna qələbə üçün çıxırıq. Çalışırıq ki, bacardığımız qədər çox xal toplayaq.

- Premyer-liqa klublarından kimlərə azarkeşlik edirsən?
- Premyer-liqanı izləyirəm, bu il orda da maraqlı mübarizə gedir. Liderlə digər komandalar arasında xal fərqi hədsiz azdı. Hansısa klubun adını çəkmək istəmirəm, çempionun kim olacağını indidən demək çətindi.
 
- Xarici komandalardan kimin fanatısan?
- Uşaqlıqan "Qalatasaray" fanatıyam.  Bu il "sarı-qırmızılar" Çempionlar Liqasında mübarizə aparırlar. Onların qrupdan çıxacağına inanıram. 

- Favoritin olduğu yerli və əcnəbi futbolçu?
- Həm insan, həm də futbolçu kimi örnək aldığım yeganə futbolçu Kristiano Ronaldodu.

- "Qarabağ"ın qrupdan çıxacağına inanırsanmı?
- Əlbəttə. "Qarabağ"ın son illərdəki nəticələri göz qabağındadı. Bu il də Avropa Liqasının qrupunda 6 xalla 2-ci yerdədilər. Ağdam təmsilçisinin qrupdan çıxıb Azərbaycan xalqını sevindirəcəyinə inanıram.

ABDULLA İSMAYILOĞLU