Mirça Luçesku futbol məşqçiləri arasında öz yeri və çəkisi olan adamdı. Rumıniyalı mütəxəssis karyerası boyunca vətəni ilə yanaşı, Rusiya, Türkiyə, Ukrayna və İtaliyada da çalışıb. Luçenin sonuncu iş yeri üç il çalışdırdığı Kiyev “Dinamo”su oldu.

Xatırlayırsızsa, o, “Şaxtyor”a məğlubiyyətin ardından nəinki Ukraynadan, hətta məşqçilikdən getdiyini bildirmişdi. Amma “Sport-Ekspress”ə müsahibəsində tam fərqli sözlər deyib.

- Cənab Luçesku, məşqçi karyeranızı bitirməyinizlə bağlı xəbər oxuduq. Bu gerçəkdi?
- Yalandı! Mən Kiyev “Dinamo”sundan getmişəm, peşəkar futboldan yox. Çox güman, bu, sadəcə, çox emosional açıqlama idi. Həyatımda heç vaxt ardıcıl üç oyunda uduzmamışdım. Bir ay əvvəl “Şaxtyor”dan 6 xal fərqi ilə birinciydik. Təəssüf ki, ardından nə olmalıydısa, o da oldu. “Şaxtyor”la oyunun (0:1) ardından çox emosional idim, hər şeyi içimdə saxlamaq mümkünsüz idi. Bu üzdən dedim ki, bəsdi, mən bitirirəm. “Dinamo”da 3, Ukraynada isə ümumilikdə 15 il işlədim. Bu kifayətdi. Bax, bütün həqiqət bundan ibarətdi. İndi mən evdəyəm – Buxarestdə. Mənə yardım edən hər kəsə təşəkkür etmək istəyirəm. Azarkeşlərsiz, sponsorlarsız, reklamsız, maliyyə yardımı olmadan futbol oynamaq hədsiz çətindi. Yalnız akademiyadan olan gənclərin hesabına çıxış etmək... İstənilən halda, futbolu həyatımda saxlamağa çalışdım. Hətta belə çətin durumda da ən çox vacib olan budu.

- İndi siz, sadəcə, karyeranızı dayandırmısız və başqa ölkələrdən təklif gözləyirsiz?
- Yox-yox, təkliflər var. Özümü yaxşı hiss edirəm. Heç bir problem yoxdu – nə fiziki, nə də mental baxımdan.

- Sizi indi Rusiyada görmək mümkündümü?
- “Dinamo”dan ayrıldığım gündən lap az vaxt keçib. Bir ay sonra gələcəyimlə bağlı vəziyyət daha aydın olacaq. Deyə bilərəm ki, bütün ölkələrə hörmət edirəm.

- “Zenit”in çıxışını izləyirsizmi?
- Bəli! Semakın uğurlarına sevinirəm. Onda əla alınır! Heyif ki, belə gözəl komanda bütün bu vəziyyət üzündən avrokuboklarda çıxış edə bilmir... Ancaq Sergeyin uğurlarını izləyirəm! Onda hər şey qaydasındadı. Semak kollektivdə işgüzar mühit yaradan əla məşqçidi, nəticələr də hər şeyi açıq-aydın göstərir. Ümid edirəm ki, tezliklə hər şey bitəcək, Ukraynada azarkeşlərin önündə oynayacaqlar, Rusiya avrokuboklara qayıdacaq, ümumiyyətlə, hər şey normada olacaq.