“Futbolçuların MOİK-ə və ya "Dinamo"ya cəlb olunması mənim işim deyil”
Ölkəmizin U-19 yığması Özbəkistanda iki uğursuz oyun keçirib qayıdandan sonra komandanın baş məşqçisi Aqil Nəbiyev açıqlama verərək demişdi ki, heyətlə bağlı ciddi problemlər var.
O, 5 futbolçunun həqiqi hərbi xidmətə çağrıldığını xüsusi vurğulamışdı. Bunlar Lətif Rzayev, İbrahim Ağayarov, Hacıəli Şirəliyev, Samir Ağayev və Murad Musayevdi. Özbəkistanla yoldaşlıq oyunları bir yana, yığma Lüksemburqda keçiriləcək seçmə oyunlarda da bu futbolçuların yoxluğunu hiss edəcək. Bəs baş məşqçi həmin futbolçuların MOİK-ə və ya yeni yaradılan "Dinamo"ya cəlb edilməsi, həm futbol oynamaları, həm də hərbi xidmət çəkmələri ilə bağlı təşəbbüslə çıxış edibmi? Bu suala aydınlıq gətirmək üçün Aqil Nəbiyevlə əlaqə saxladıq:
"Futbolçuların MOİK-ə və ya "Dinamo"ya cəlb olunması mənim işim və səlahiyyətim deyil. Bunun üçün aidiyyatı qurumlar var. Amma bir baş məşqçi kimi bununla bağlı AFFA-ya müraciət etmişəm".
Futbolçuların taleyi ilə bağlı AFFA-ın sözçüsü Elnur Məmmədlidən də fikir öyrəndik:
"Bəli, bu məsələdən xəbərimiz var. Müvafiq instansyalara bununla bağlı müraciət olunub. Ümid edirik ki, məsələ həllini tapar".
Bəs Daxili İşlər Nazirliyinin himayəsi altında yaradılan və 2-ci liqada çıxış edən "Dinamo"ya futbolçuların cəlb olunmasıyla bağlı hansı işlər görülüb? Bununla bağlı klub prezidenti Yaşar Seyidovun reaksiyasını öyrəndik:
"Bizim klubun yaradılmasında əsas məqsəd ölkə futbolu üçün potensialı oyunçuları itirməmək və hərbi xidmət zamanı da futbol oynamalarını təmin etməkdi. Amma hazıda bu təminatla bağlı işlər oturuşmayıb. Bu ciddi layihə ilə DİN, AFFA, PFL birgə məşğuldu. Əsas da AFFA ilə PFL-in övsiyəsi əsasında istedadlı futbolçuların klubumuza cəlb olunmasını təmin etməyi planlaşdırırıq. Digər çətinliyimiz isə odu ki, hazırda bu işin praktikada həyata keçirilməsi ləngiyir. Bunu tezləşdirmək üçün bəzi işlər görürük. Klubun Müşahidə Şurası yaradılacaq və üzvlərimiz sırasında DİN əməkdaşları da yer alacaq. Biz tərəfdən işlər görüləcək. Hazırda baza və infrastruktur ilə bağlı ciddi problemlərimiz var. Biz əmin olmalıyıq ki, hərbi xidmətə cəlb etdiyimiz oyunçuların ən azı qalmaq, qidalanmaq və sağlamlığı ilə bağlı işləri rahatlıqla həyata keçirəcəyik. Bir misal çəkmək istərdim. Məşhur “Spartak” filmində baş qəhrəman romalılara məğlub olandan sonra dostu ona deyir: “Biz niyə məğlub olduq? Axı çoxlu tərəfdarlarımız var idi”. Bu zaman Spartak deyir: "Azadlığı hamı sevir, amma onun uğrunda heç kim ölmək istəmir". İndi filmdəki ifadəylə yanaşsaq, bütün klublar gənc futbolçularını itirmək istəmir, amma bunun üçün heç nə etmirlər. Hər şeydən və hər kəsdən əvvəl gərək klub rəsmiləri gənc istedadlarına sahib çıxsın, bizə müraciət etsin, dəstək olsunlar".
ABDULLA İSMAYILOĞLU
Digər xəbərlər
