“İrəvan” məsələsi artıq gündəmdən düşmək üzrədi. Qərbi Azərbaycan təmsilçisi “Mingəçevir”lə səfər matçına tam heyətlə çıxıb. Oyunçuların çoxu maaşının azaldılmasına razılıq verib. Lakin həll olunmayan bəzi məsələlər var.

7 futbolçu komandadan ayrılmaq istəyir. Bunlar kapitan Vüqar Bəybalayev, Mirabdulla Abbasov, Mirsayib Abbasov, İbrahim Əliyev, Ruslan Hacıyev, Ədilxan Qaraəhmədov və Asim Əlizadədi. Onlar transfer vərəqələrini almaq üçün rəhbərliklə danışıqlara başlayıblar. Yayda heyətə qoşulan oyunçular 3 aydı maaş ala bilmədikləri üçün bu addımı atıblar. Hacıyev artıq məsələ ilə bağlı AFFA-ya da şikayət edib.

"Football-plus.az"a daxil olan məlumata görə, “İrəvan” onları sərbəst buraxacaq. Amma burda maraqlı bir məsələ var: klub oyunçuların getməsində özü maraqlıdı. Çünki bununla onlara verməli olduqları puldan qurtulacağını düşünür. “İrəvan”ın əlini gücləndirən detallar da var. Futbolçular müqavilə şərtlərini pozublar. FIFA qaydalarına görə oyunçular 2 ay ərzində maaşını ala bilməsə, kluba yazılı müraciət etməlidi. Lakin “İrəvan”ın futbolçuları bunu etməyib.

Redaksiyamıza maraqlı məlumat daxil olub. Yuxarıda qeyd etdiyimiz 7 futbolçunun və Arsen Ağcəbəyovun klubla münasibətləri o dərəcədə pozulub ki, onlar AFFA-nın Futbolçuların Statusu və Transferi Komitəsinə müraciət etmək istəyib. Lakin “İrəvan”ın əlindəki detal onları bundan çəkindirib. Futbolçulara yaxın bir nümayəndə klub rəhbərliyi ilə görüşüb. “İrəvan” rəsmiləri də AFFA-ya şikayət verməyə hazırlaşırmış. Futbolçuların nümayəndəsinin danışığından sonra klub bu istəyindən əl çəkib. Tərəflər yekunda razılığa gəliblər. Arsen Ağcabəyov maaşının azaldılmasına razı olub. “İrəvan” futbolçuya olan borcun müəyyən hissəsini ödəyib. Qalanından isə Arsen imtina edib.


Vüqar Bəybalayev “İrəvan”ın ödənişlərin imtina edib. Sadəcə, “pələnglər”dən transfer vərəqini tələb edib. Yaxın günlərdə o öz istəyinə çatacaq. Yarımmüdafiəçi, ümumiyyətlə, karyerasını bitirərək başqa işə başlayacaq. O, skautluq etmək niyyətindədi.

Mirabdulla və Mirsayib Abbasov qardaşları isə menecerləri vasitəsi ilə “İrəvan”la arasında problemi həll etməyə çalışacaq. Onlar da transfer vərəqələrini alandan sonra başqa klubla danışıqlara başlayacaq.

Ruslan Hacıyev “İrəvan”dan AFFA-ya şikayət edib. Oyunçunu hazırda azad agent saymaq olar. “İrəvan”ın ondan şikayət edib-etməyəcəyi bəlli deyil. İbrahim Əliyev, Ədilxan Qarəhmədov və Asim Əlizadə də transfer vərəqini almağa çalışır. Lakin onların hansı şərtlərlə klubla razılaşdığı bəlli deyil.

Bir sözlə, “İrəvan” ətrafındakı qalmaqalın artıq başa çatdığını demək olar. Futbolçular öz səhvləri ucbatından məğlub oldular. Onlar haqlı olaraq klubdan pullarını almaq istəyirdilər. Lakin etiraz metodu yanlış idi. Ümid edirik ki, “İrəvan”da bir daha belə münaqişə yaşanmayacaq.

İLKİN SULTANLI