“Qəbələ” macarlara gücünü səfərdə göstərdi - REPORTAJ
Dünən “Qəbələ”nin U-19 komandası Gənclər Liqasında növbəti oyununu keçirib. “Qırmızı-qaralar” Çempionlar yolunun 1-ci mərhələsinin cavab görüşündə “Puşkaş Akademiyası”yla üz-üzə gəlib.
Qəbələdəki ilk qarşılaşmada 1:1 hesablı “sülh”ə razılaşan kollektivin Macarıstanda qələbə qazanmaqdan başqa yolu yox idi. Xoşbəxtlikdən belə də olub. Famil Xəlilovun yetirmələri 1:0 hesablı zəfərlə sınaqdan üzüağ çıxıb. Daha dəqiq desək, Kənan Baxışov 56-cı dəqiqədə meydan sahiblərinin qapısına yol tapıb. Komanda bununla 2-ci mərhələyə yüksəlib. “Qırmızı-qaralar” sözügedən turnirdə bu uğura 2-ci dəfə imza atıb. Baş məşqçi Famil Xəlilov görüş haqda təəssüratlarıNI "Football-plus.az"la bölüşdü:
"İlk oyundan sonra səfərdə işimizin çətin olacağını bilirdik. Çünki macarıstanlıların yetərincə güclü futbolçularının olduğunu gördük. Rəqibin üstün və zəif cəhətlərini təhlil edib futbolçulara uyğun taktiki tapşırıqlar vermişdik. Qarşı tərəf bu dəfə də eyni tərzdə oynadığından və oyunçularımız buna hazır olduğundan layiqli qələbə qazandıq. Hər iki komandanın çoxlu qol imkanı var idi. Xoşbəxtlikdən biz şansdan faydalanıb qol vurduq. Növbəti rəqibimizi gözləyirik. Bundan sonrakı hədəf 2-ci mərhələdəki oyuna köklənmək, maksimum yaxşı hazırlaşmaqdı. Qola gəlincə, gözəl və maraqlı alındı. Standart vəziyyətlərin üzərində işləmişdik. Həmin bölgədən Kənanın zərbə vurmasını planlaşdırmışdıq. Lakin onun ötürmədən sonra qol vurması üçün hazırlığımız yox idi. Bəzi məsələləri oyunçuların öhdəsinə buraxmışdıq. Mənim üçün də sürpriz oldu. Deməli, futbolçularda özünəinam var".
Gənclər Liqası
Çempionlar yolu, 1-ci mərhələ, cavab görüşü
Puşkaş Akademiyası (Macarıstan) – Qəbələ 0:1 (0:0)
Puşkaş Akademiyası: 12. Andres Perczel, 18. Boqdan Makara (19. Levent Koç, 71), 20. Roland Vajda, 3. Adam Umatum, 4. Akos Markqraf (k), 16. Dmitri Dmitriev (21. Szabolks Duzinski, 63), 23. Maksim Osadçi, 10. Bens Vekoni, (6. Luka Qoyko Yuriçiç, 71), 13. Roland Szabari (14. Bens Somfalvi, 57), 17. Aleksandr Puskur, 11. Oleq Yablonoski (7. Dmitri Lahuntsov, 63).
Baş məşqçi: İştvan Kortvelyez.
Qəbələ: 16. Məmməd Muradov, 17. Eşqin Əhmədov, 4. Nuğay Rəşidov (k), 3. İbrahim Ramazanov, 13. Ravil Qafarov, 18. Şahin Şahniyarov, 6. Fuad Əhmədov (19. Rüfət Bədəlzadə, 73), 10. Okan Təhməzli, (8. Rəvan Əsədov, 83), 11. Kənan Baxışov, (5. Qədir Ramazanov, 73), 9. Sənan Ağalarov, 14. İlkin Budaqov (7. Xəyyam Məmmədli, 29).
Baş məşqçi: Famil Xəlilov.
Qol: K.Baxışov, 56.
Vərəqələr: A.Markqraf, 22. E.Əhmədov, 31. S.Ağalarov, 43. R.Szabari, 54. R.Qafarov, 60. X.Məmmədli, 71. S.Duzinski, 74. A.Puskur, 75. R.Bədəlzadə, 81. D.Lahuntsov, 90+5. M.Muradov, 90+8. A.Perczel, 90+9 – sarı. A.Perczel, 90+9 – qırmızı (ikinci sarı).
25 (8) qapıya (“çərçivə”yə) zərbə 2 (1)
4 künc zərbəsi 2
0 ofsayd 0
6 qayda pozuntusu 9
7 (1) sarı (qırmızı) vərəqə 6 (0)
58 topa sahibolma (faizlə) 42
Hakimlər: MƏHƏMMƏD USMAN ASLAM, Tom Harald Qronevik, Yorgen Ronninq Valstadsve (hamısı Norveç), Marton Ruş (Macarıstan).
25 oktyabr. Macarıstan. “Panço Arena”.
Qeyd edək ki, “Qəbələ” növbəti mərhələdə “Olimpiakos”la qarşılaşacaq. Yunanlar İtaliya “Leççe”sinə həm evdə, həm də səfərdə 3:1 hesabıyla qalib gəlib. “Qəbələ” “Olimpiakos”la ilk oyunu noyabrın 8-də evdə, cavab görüşünü isə 29-da səfərdə keçirəcək.
KƏNAN BAHADIR
Digər xəbərlər
