“Bəzi futbolçular tapşırıqların öhdəsindən gəlsə də, bəziləri məni qane etmədi” – Qəbələdən etiraf gəldi
Dünən “Qəbələ”nin 19 yaşadək futbolçulardan ibarət komandası UEFA Gənclər Liqasında ilk oyuna çıxdı. Çempionlar yolunun 1-ci mərhələsində Macarıstan təmsilçisi “Puşkaş Akademiyası”yla qarşılaşan “qırmızı-qaralar” meydandan bərabərliklə ayrıldı – 1:1.
Oyunla bağlı fikirlərini öyrənmək üçün “Qəbələ”nin U-19 komandasının baş məşqçisi Famil Xəlilovla əlaqə saxladıq. Onun “Football-plus.az”a söylədikləri:
“Yetərincə maraqlı oyun idi. Nəticənin ədalətli olduğunu düşünürəm. Hər iki tərəfdənçoxlu qol epizodunu şahidi olduq. İlk hissədə biz, ikincidə rəqib üstün çıxış etdi. Görüşə çox ciddi hazırlaşmışdıq. Bu matçla birlikdə son 10 gündə 3-cü dəfə müydana çıxdıq. Komandamın yorğunluğu xüsusilə ikinci yarıda özünü büruzə verdi. Ad çəkmək istəmirəm, amma bəzi futbolçular tapşırıqların öhdəsindən gəlsə də, bəziləri məni qane etmədi. Buna baxmayaraq, komandama inanıram və inamlı mübarizə üçün bütün oyunçularıma təşəkkür edirəm”.
Mütəxəssis cavab görüşünün daha maraqlı olacağını düşünür:
“Artıq bir-birimizi yaxşı tanıyırıq. Rəqibin üstün və zəif cəhətlərini diqqətlə təhlil edəcəyik. “Puşkaş Akademiyası” yetərincə təcrübəlidi. Əsasən standart vəziyyətlər zamanı uzun ötürmələrlə ciddi təhlükələr yarada bilir. Düşünürəm ki, ev oyununda da bu üstünlükdən faydalanmağa çalışacaq. Həmin oyuna qədər liqada iki görüşümüz var. Çempionat qarşılaşmalarında əskikləri aradan qaldırmağa çalışacağıq”.
Famil bəy PFL-in əvəzedicilər liqasında “Kəpəz-2” ilə matçı təxirə salmamasına da münasibət bildirdi:
“PFL-in qərarı anlaşılandı. Çünki Əsasnamədə belə hallarla bağlı “7+4” qaydası var. Yəni 7 nəfər 2002 və daha gənc təvəllüdlü olmalıdı. Bizim uşaqların yaşı U-19-da çıxış etmək üçün çatsa da, əvəzedici heyətdə oynayırlar. Daha dəqiq desək, PFL tələblərə uyğun davrandı. Burda onların edə biləcəyi əlavə nəsə yox idi”.
Xatırladaq ki, “Qəbələ” matça daha yaxşı hazırlaşmaq məqsədilə PFL-dən U-19 və əvəzedicilər liqasının matçlarını təxirə salmağı xahiş etmişdi. Qurum U-19-un oyunlarını təxirə salsa da, əvəzedicilər liqasında oktyabrın 2-də “Kəpəz-2” ilə keçiriləcək matç sentyabrın 29-na təyin edilmişdi.
Xatırladaq ki, “Qəbələ” ilə “Puşkaş Akademiyası” arasındakı cavab görüşü oktyabrın 25-də keçiriləcək.
KƏNAN BAHADIR
Digər xəbərlər
