“Qarabağ” Almaniyadadı.

Bu gün Avropa Liqasının qrup mərhələsinin 3-cü turunda “Bayer-04” ilə üz-üzə gələcək. “Köhlən atlar”la birgə media mənsubları da Leverkuzenə yollanıb. “Futbol+”in əməkdaşı olaraq, mən də burdayam. Yəqin ki, müxtəlif media orqanlarında həmkarlarımın təəssüratını oxumusuz.

Bilirsiz ki, “Mediasport.az” saytının baş redaktoru Elvin Əhədə viza verilmədiyi üçün Heydər Əliyev adına Hava Limanından geri qayıtmalı oldu. Bizimlə birgə “Hünər Group”un rəhbəri Ehtiram Quliyev də Almaniyaya səfər edib. Futbolçular səfər boyunca sakit görünürdülər. Komandanın ağsaqqalları və təcrübəliləri – Maksim Medvedev, Riçard Almeyda, Bədavi Hüseynov jurnalistlərlə xüsusi görüşdü, baş məşqçi Qurban Qurbanov və köməkçiləri də mehriban şəkildə media mənsubları ilə söhbətləşirdi. 5 saatlıq uçuş gözə çox görünməsin deyə, ənənəvi “şəhər və klub adları” oyununu oynadıq.

Almaniya vaxtı ilə saat 22.50-də Köln hava limanına çatdıq. Burdan isə Leverkuzenə yollandıq. “BayArena”nın daxilində yerləşən “Lindner” otelində qalırıq. İndiyə kimi müxtəlif ölkələrə və şəhərlərə futbolla bağlı getmişəm. Amma belə arena görməmişəm. Stadionun hər nöqtəsindən pul qazanmaq üçün istifadə edir “Bayer-04” rəhbərliyi.
Leverkuzen o qədər də böyük yer deyil. Bura Kölnün qəsəbəsidi. Burda göydələnlərə az-az rast gələ bilərsən. Adamlar 3-4 mərtəbəli binalarda yaşayırlar. Olduqca sakit və zavodlarla əhatələnmiş qəsəbədi. Tipik Almaniya reallığında yaşayırlar. Düzdü, bəzi yerlərdə yollar bizim Masazıra bənzəyir. Amma qəsəbənin memarlığı və təmizliyi superdi. Payızın özünəxaslığı Leverkuzeni daha da gözəlləşdirib.

Sevginin nə olduğunu anlamayanlar burdakı rahatlığı və hüzuru hiss edə bilməz. Amma insalardan nəsə soruşanda onların cavabını eşidəndə xəyallardan oyanırsan. Anlayırsan ki, bura Avropanın ən sərt və kobud insanlarının yaşadığı Almaniyadı.

Qayıdaq futbola. Qəsəbə “Bayer” sevgisi ilə yaşayır. Addımbaşı olmasa da, hər 30-40 adamdan biri “qırmızı-qaralar”ın formasını geyir. Məsələn, mən 6 saat ərzində dəmiryolu stansiyasının yaxınlığında yerləşən “Rathaus-Galeria” adlı ticarət mərkəzində oldum. Orda tez-tez gənclərin əynində “Bayer-04” formasını gördüm. Təbii ki, klubun fan-şopuna da baş çəkdim. Burda “qırmızı-qaralar”la bağlı hər şey olsa da, ən ucuz formanın qiyməti isə 90 avro idi. Ticarət mərkəzinin daxilindəki idman mağazalarında da klubun idman köynəyinin dəyəri eyni idi. Ümumiyyətlə, Leverkuzen baha qəsəbədi. Adi ikinəfərlik “fast-food”un dəyəri 18 avro idi. Taksi dəmiryolu stansiyasından “BayArena”ya 8 avroya aparır. O da “başqa pulum yoxdu” desən və sənə inansa. Burda 10 avrodan ucuz geyim ancaq corab tapa bilərsən. Amma aldığın mal yüz faiz keyfiyyətlidi.

Yenə deyirəm ki, qəsəbədə “Bayer-04”ü çox sevirlər. Ticarət mərkəzlərinin hər mərtəbəsində klubla bağlı nəsə var. Leverkuzen təmsilçisinin rəsmi saytının promo videosunu “mall”un hər yerində görə bilərsən. Amma “Qarabağ”la oyunun afişasına heç yerdə rast gəlmədim. Qəsəbənin insanları qəzet oxumağı sevirlər. Düzdü, daha çox yaşlı nəsil buna maraq göstərir. Ticarət mərkəzlərində, köşklərdə rahat şəkidə qəzet ala bilərsən. Hətta mən Türkiyənin “Sözcü”sünə də burda rast gəldim. Lakin Almaniya qəzetlərinin heç birində “Bayer-04” – “Qarabağ” görüşü ilə bağlı geniş yazı dərc olunmamışdı. “Bayer-04”in ultrası özünə aid nişanları hər yerə vurub. “Rathaus-Galeria”nın tualetindən istifadə edəndə belə “Levultras 89!” yazısına rast gəldik. Azarkeşlərdən kimsə fanat qrupunun adını qapıya həkk etməyi özünə borc bilmişdi.
Leverkuzenin cazibədarlığından kitab yazmaq olar. Amma “BayArena” lap başqa aləmdi.

Bu gün “Qarabağ” “BayArena”da çətin oyuna çıxacaq. Rəqib Avropada bütün turnirlərdə uduzmayan yeganə komandadı. Amma Qurban Qurbanovun və komanda üzvlərinin üzündəki rahatlıq ifadəsi hər şeyin yaxşı olacağından xəbər verir. Təki yaxşı olsun, komandamız burdan xalla dönsün və biz də rahat şəkildə deyək ki, sağ ol, “Qarabağ”!

İLKİN SULTANLI, Leverkuzen