"Üç övladım var, "Füzuli"ni 4-cü balam kimi bilmişəm. Bu komandanı yaradanda çox əziyyət çəkdik. Bizə heç bir yerdən nə maddi, nə də mənəvi dəstək gəldi. Ancaq ətrafımdakı sadiq insanlarla birgə "Füzuli"ni indiki səviyyəyə gətirə bilmişik. Xəqani, Vüqar, Bəşir, Amil, Həsən və başqa dostlarımın, qohumlarımın dəstəyi olub. Məqsəd doğma yurdumuzdakı futbolu ölməyə qoymamaq idi. Bilirsiz ki, hələ sovet dönəmindən Füzulidə futbol populyar olub. Hətta həmin illərdə qazonuna görə Azərbaycanda iki ən yaxşı stadiondan biri bizdə idi. Biz də məhz bu ənənəni davam etdirmək üçün doğma diyarımızda "Füzuli"ni təsis etdik. Şükürlər olsun, 2-ci liqaya qədər gəlib çıxmışıq. İstefama gəlincə, öz arzu-istəyimlə etdim. Artıq getməyin vaxtı gəlmişdi. Amma bu o anlama gəlməməlidi ki, "Füzuli"dən inciyəm. Qətiyyən. Ürəyim daim bu komanda ilə döyünəcək. İnanıram ki, Rauf Quliyev rəhbərliyi altında "Füzuli" yeni-yeni uğurlara imza atacaq.

Nə vaxtsa komanda büdrəsə, tənəzzülə getsə, ağır günlərini yaşasa, yenə doğma rayonumun klunu üçün əlimdən gələni edəcəm. Təki "Füzuli" var olsun. Bu yaxınlarda oxudum ki, İmişlidən olan Bəhlul Mustafazadə bölgəsinin komandası üçün jest edib. Millimizin üzvü şəxsi vəsaiti sayəsində imişlili uşaqlara buts alıb. Təqdirəlayiq haldı. İmişlinin bir məşhur Bəhlulu varsa və belə addım atırsa, Füzulidən olan çoxlu məşhur oyunçumuz var. Onlardan da belə jest gözləyirəm. Ən azı Rauf Əliyev, Qara Qarayev, Vüsal İsgəndərli, Səlahət Ağayev və başqalarından doğma klubumuza mənəvi dəstək gözləyirik. Əslində tək bizə yox, elə Region Liqasında mübarizə aparan "Ərgünəş"ə də oxşar qayğı göstərilməsinə çağırıram. Bir faktı deyəcəm. Ötən mövsüm Region Liqanın qalibi "Qusar" çempionluğa qədər gəlib çatanda hər oyunda Qusardan olan Rahid Əmirquliyev paltardəyişmə otağında qusarlı oyunçulara mənəvi dəstək verirdi. Odu ki, məşhur futbolçularımızı "Füzuli"yə dəstək olmağa səsləyirəm".