Canni de Byazi bir neçə gün əvvəl Avstriya və Estoniya ilə oyunlar üçün yığmanın heyətini açıqladı. Xeyli vaxtdan sonra Rəşad Əzizli yenidən ölkənin əsas komandasına dəvət aldı. Yeni sima isə Nəriman Axundzadə oldu.

Həmişəki kimi "geniş futbolçu seçiminə malik deyilik" deyən italiyalı aşağı-yuxarı eyni futbolçulara dəvət göndərsə də, yenə bizi təəccübləndirdi. Belə ki, son oyunlarda faydalı iş əmsalıyla seçilən Anatoli Nuriyevlə Amin Seydiyevə, mövsümə yaxşı başlayan və komandasının bombardiri olan Rövlan Muradova, Albaniyada qollar vuran Vüsal İsgəndərliyə və Ukrayna millisinində oynamaqdan imtina edərək “vətənim üçün oynayacam” deyən Emil Mustafayevə dəvət göndərilmədi. Əvəzində 9 turda "Neftçi"də doğru-dürüst şans qazanmayan Höccət Haqverdi, Filip Ozobiç və Eddi İsrafilov çağrıldı. Düzdü, sonuncu zədəsini tam sağaltmadığından geri göndərildi. Deyək ki, xorvatiyalı təcrübəsi, duran toplarda effektivliyi və pleymeykerliyi sayəsində faydalı ola bilər. Bəs mövsümdə cəmi 288 dəqiqə şans qazanan iranlıya dəvət göndərmək hansı məntiqə sığır? De Byazi səfərdə avtriyalılar önündə darmadağın olduğumuz oyunda özünü doğrultmayan Höccətə Bakıdakı matçda da start heyətində yer verməklə nəyə nail olacaq?! Zəif hesab etdiyimiz, amma "Dalğa Arena"da bizə ilk hissədə futbol dərsi keçərək hesabı açan estonlarla ağır səfər oyununda cinahlarda sürətli vingerlərə və yüksək qol duyumuna malik oyunçulara ehtiyac olduğundan yuxarıda adlarını sadaladığım futbolçular niyə kənarda qalmalıydı?! Suallar o qədər çoxdu ki, onları bir-biri yazsam, gərək “1001 sual” kitabı yazıb, ömürboyu cavabları özüm axtarım...

Amin Seydiyevin müdafiədə aqressivli və hücumlara sürətli çıxması komandaya fayda verə bilərdi. De Byazi onu hesabdan sildi. Rövlan Muradov ən azı 2-ci yarıda meydana çıxmaqla oyuna yeni nəfəsə verə bilərdi. Onun sürətli keçidləri, standart vəziyyətdən həmlələri çətin rəqib sayılan Avstriya ilə oyunda lazım olacaqdı. İtaliyalı bunu görməzdən gəldi.

Anatoli Nuriyev "Sabah"da normal təsir bağışlayan nadir oyunçulardan biridi. Onu ilk dəqiqələrdən oynayan və yorulacaq Ramil, Renat, Mahir, Musanın əvəzinə fasilədən sonra meydana buraxıb irəlidə fəallığı qorumaq olardı. Bu da baş məşqçini maraqlandırmır. Hazırda Albaniya çempionatına uyğunlaşaraq yaxşı çıxışıyla seçilən Vüsal İsgəndərlinin sürəti, qol duyumu yığmamıza çox kömək edə bilərdi. Futbolçunun xeyli vaxtdı ölkənin əsas komandasında dəvət almadığını nəzərə alsaq, italiyalı ona açıq qapı elan etsəydi, sabiq "Sumqayıt"lı daha yaxşı motivasiya ilə meydana çıxacaq və maksimum can qoyacaqdı. Amma De Byazi onun da potensialına laqeyd yanaşdı.

Az qala bütün futbol azarkeşləri uzun müddətdi Ukraynada çempionatında top qovan Emil Mustafayevə dəvət göndərilməsini istəyir. Soydaşımız Ukraynadan aldığı dəvətlərdən imtina edib, Azərbaycanın əsas komandasının formasını geyməkdə maraqlıdı. AFFA-nın və yığmanın əsas seleksiyaçısı İlqar Qurbanov qəzetimizə açıqlamalarında Emil Mustafayevi daim nəzarətdə saxladığını, hətta dəfələrlə De Byaziyə futbolçunun yığmaya çağrılmasını tövsiyə etdiyini deyib. Hələ zəlil günə qalmış, dağılmış, rus ayısnın pəncədi altında qalan və sabaha ümidi olmayan Ukrayna superliqası ağırlığını qoruya bilib. Emil də bu mövsümdən "Polesye"də çıxış edir. O, yeni komandada da özünü yaxşı tərəfdən göstərərək həm qol vurur, həm də assistentlik edir. 10 turdan sonra Emilin komandası ilk "3-lük"dədi. Mən demirəm ki, "Polesye"dəki soydaşımızın yığmaya dəvət olunması qarşıdakı iki oyunda 100% qələbəni və qrupdan çıxmağı təmin edəcək. Xeyr. Amma və lakin Azərbaycan seçməsinə yeni nəfəs gətirəcəyi və hücum xətdində canlanma yaradacağı şübhə doğurmur. Ona bu gün yox, nə vaxt dəvət göndərəcəyik? Yoxsa bunun üçün İman Mehdinin, İsa Məsihin zühr etməsini gözləməliyik?! Amma De Byazi qəribə seçimləri və laqeydliyi ilə göstərir ki, müsəlmanlarla xristianların müqqədəslərinin gəlişi daha tez gözlənilir, nəinki Emilin ölkənin əsas komandasına qazandırılması.

Əlacsız, ruhdan düşən, inamsızlığa qapılan deyiləm. Amma acı reallıqlarla da hesablaşır, onu əvvəlcədən görməyə çalışıram. Odu ki, italiyalının seçimi, yaxşı performans sərgiləyən futbolçuları ofsaydda saxlaması ilə nə doğma meydanda Avstriya, nə də səfərdə Estoniya üzərində zəfər qazanacağıq...

ABDULLA İSMAYILOĞLU