Hesabat turu cümə günü Münhenqladbaxda start götürdü. Məhsuldar bərabərliklə yekunlaşan matçda “Borussiya” evdə, “Maynts-05” isə səfərdə ilk xalını qazandı.

“Union” heç cür pxisoloji quyudan çıxa bilmir. Vəziyyət düzəlmək əvəzinə turdan-tura daha da pisləşir. Çox güman, bu ortabab komanda ÇL-ə vəsiqə qazandığına görə peşmandı. Çünki məğlubiyyətlər bir-birini əvəz edir. Dortmund səfərində “Union” gözlənilmədən fasiləyə üstün yollandı. Penalti zamanı topun başına keçən Bonuççi 36 yaş 159 günlüyündə fərqlənməklə son 21 ildə bundesliqada ilk qolunu ən gec yaşda vuran futbolçu oldu! 2002-də Karsten Linke “Hannover-96”nın heyətində bundesliqada ilk qolunu 37 yaş 2 günlüyündə vurmuşdu. Bonuççi eyni zamanda bundesliqa tarixində qol vuran ən yaşlı italiyalıdı. Fasilədən sonra isə “Borussiya” rəqibinə yerini göstərərək bundesliqadakı məğlubiyyətsiz seriyanı 15 oyuna çatdırdı. Paytaxt təmsilçisi “Siqnal Iduna Park”da keçirdiyi 7-ci rəsmi oyundan da məğlubiyyətlə ayrıldı. “Union” bundesliqada 5-ci, rəsmi oyunlarda ardıcıl 7-ci məğlubiyyətlə üzləşdi. ÇL iştirakçısı üçün çox acınacaqlı bir göstəricidi. Ardıcıl 7 məğlubiyyət ümumiyyətlə bu klubun son 19 ildəki ən bərbad seriyasıdı. “Leyptsiq” üçün martdakı ssenari təkrarlandı. 7 ay öncə “öküzlər” ÇL-də “Mançester Siti”yə 0:7 hesablı məğlubiyyətdən sonra özünə gələ bilməyərək səfərdə “Bohum”a minimal hesabla uduzmuşdular. Bu dəfə də “Leyptsiq” ÇL-də “Siti”yə uduzandan sonra “Bohum”la bacara bilmədi. Hərçənd bu dəfə, heç olmasa, 1 xal qazanmaq mümkün oldu. “Ştutqart” futbol ictimaiyyətini yaxşı mənada təəccübləndirməkdə davam edir. Şvabiyalıların budəfəki qurbanı “Volfsburq” oldu. 7 tura 18 xal klub tarixinin yeni rekordudu. “Ştutqart”ın ardıcıl 5-ci turda ən azı 2 top fərqi ilə qalib gəlməsi də diqqəti çəkir. Eynilə şvabiyalılar kimi leverkuzenlıilər də tarixinin ən uğurlu startını reallaşdırıb. Özü də tək xal hesabında yox, məhsuldarlıq baxımından da. Xabi Alonsonun komandası “Köln”lə ev oyununda ciddi problem yaşamadı. “Bayer-04” bu mövsüm keçirdiyi 10 rəsmi oyunun heç birində uduzmayıb (9 qələbə, 1 heç-heçə). “Bavariya” isə Komanın dubl etdiyi oyunda “Frayburq”a heç bir şans vermədi. Keyn fərqlənə bilməsə də, hesabına məhsuldar ötürmə yazdı. Münhen nəhənginin bundesliqa çərçivəsində bu rəqibə qarşı evdə keçirdiyi 24-cü oyunda da uduzmadığını bildirək (21 qələbə, 3 heç-heçə).

7-ci tur
Bavariya – Frayburq 3:0
Koman, 12; 85. Sane, 25. (75000)
Bavariya: Ulrayx, Mazraui, Upamekano (Laymer, 77), Kim Min Çje, Devis, Kimmix, Qoretska, Sané, Müller (Musiala, 72), Koman, Keyn (Tel, 72).
Frayburq: Atubolu, Sildilliya, Linhart, Qulde, Şallai (Breyniq, 84), Röl (Filipp, 46), Eqqeştayn (Rüdlin, 84), Kübler, Dōan (Vaysshaupt, 68), Qrifo, Höler (Adamu, 68).
Borussiya D – Union 4:2
Füllkruq, 8. Şlotterbek, 49. Brandt, 53. Ryuyerson, 71 – Qosens, 9. Bonuççi, 31-p. (81365)
Borussiya: Kobel, Ryuyerson, Şlotterbek, Hummels (Zyule, 73), Volf, Əmrə Can, F.Nmeça, Malen (Reyna, 64), Roys (Salih Özcan, 83), Bayno-Gittens (Brandt, 46), Füllkruq (Alle, 83).
Union: Rönnov, Trimmel (Russiyon, 68), Duxi, Bonuççi, Leyte, Qosens, Král (Tuzar, 20), Layduni (Aaronson, 55), Haberer, Berens (Folland, 68), Bekker, (Fofana 68').
Leyptsiq – Bohum 0:0
(44269)
Leyptsiq: Blasvix, Simakan, Klostermann, Lukeba, Raum, Baumqartner (Forsberq, 57), Simons (Verner, 78), Kamp, Şlager (Karvalyo, 78), Openda (Aydara, 78), Şeşko (Poulsen, 57).
Bayer-04 – Köln 3:0
Hofmann, 22. Frimponq, 32. Bonifas, 67. (30210)
Bayer-04: Qrádetski, Kossunu, Ta, Tapsoba (İnkapye, 71), Frimponq (Tella, 81), Palasios, Caka, Qrimaldo, Hofmann (Puerta, 88), Virts (Adli, 71), Bonifas (Hlojek, 81).
Ayntraxt F – Haydenhaym 2:0
Larsson, 39. Knauff, 72. (50000)
Ayntraxt: Trapp, Buta, Tuta, Kox, Paço, Maks (Nkunku, 78), Skiri, Larsson (Hasebe, 90), Çaibi (Smolçiç, 90), Marmuş (Ferri, 67), Nqankam (Knauff, 67).
Ştutqart – Volfsburq 3:1
Girassi, 67-p.; 78; 82 – Gerhardt, 34. (52000)
Verder – Hoffenhaym 2:3
Şmid, 17. Staqe, 90+1 – Bayer, 8. Prömel, 29. Bülter, 90+2. (41000)

Borussiya M – Maynts-05 2:2
Noyhayus, 22. Skalli, 88 – Qruda, 24. Barkok, 75. (51529)
Auqsburq – Darmştadt 1:2
Demiroviç, 86 – Skarke, 52. Kempe, 70-p.
1. Bayer-04 7 6 1 0 23-6 19
2. Ştutqart 7 6 0 1 22-8 18
3. Bavariya 7 5 2 0 23-6 17
4. Borussiya D 7 5 2 0 16-8 17
5. Hoffenhaym 7 5 0 2 16-11 15
6. Leyptsiq 7 4 2 1 16-6 14
7. Volfsburq 7 4 0 3 10-9 12
8. Ayntraxt F 7 2 4 1 6-5 10
9. Frayburq 7 3 1 3 7-13 10
10. Haydenhaym 7 2 1 4 10-15 7
11. Darmştadt 7 2 1 4 12-19 7
12. Borussiya M 7 1 3 3 13-16 6
13. Union 7 2 0 5 11-14 6
14. Verder 7 2 0 5 12-17 6
15. Auqsburq 7 1 2 4 10-17 5
16. Bohum 7 0 4 3 5-19 4
17. Maynts-05 7 0 2 5 6-19 2
18. Köln 7 0 1 6 4-14 1
Bombardirlər: Girassi (Ştutqart) – 13, Keyn (Bavariya) – 8, Vind (Volfsburq), Bonifas (Bayer-04) – 7.
Növbəti turun oyunları oktyabrın 20-22-si aralığında keçiriləcək: Borussiya D – Verder, Union – Ştutqart, Frayburq – Bohum, Volfsburq – Bayer-04, Maynts-05 – Bavariya, Darmştadt – Leyptsiq, Hoffenhaym - Ayntraxt F, Köln - Borussiya M, Haydenhaym – Auqsburq.

Turun rəqəmi
322 – həftəiçi Çempionlar Liqasında qələbə sayında 2-ci pilləyə yüksələn Tomas Müller indi də bundesliqada qələbə sayında rekordu təkrarladı. “Frayburq”la qarşılaşmada o, bundesliqada 322-ci qələbəsini qazanmaqla komanda yoldaşı Manuel Noyerə məxsus rekordu təkrarladı. Amma Müller 322 qələbə həddinə 448-ci oyunda çatdısa, Noyer 478-ci oyunda çatmışdı. Maraq üçün xatırladaq ki, Noyer zədə üzündən ötən ilin dekabrından bəri meydana çıxmır.

Turun ulduzu
Seru Girassi (Ştutqart) – 27 yaşlı fransalı forvard sanki bu mövsüm real futbol yox, “play station” oynayır və onun gücünü kimsə süni şəkildə artırıb. Çünki bu mövsümə qədər ortabab forvard sayılan, “transfermarkt”də hazırki dəyəri yalnız 14 milyon avro olan Girassi cari “futbol ili”ndə ağlasığmaz, hətta izaholunmaz məhsuldarlıq sərgiləyir. “Volfsburq”a qarşı 2-ci hissədə 16 dəqiqəyə het-trik futbolçu 7 tura vurduğu qolların sayını 13-ə (!) çatdırdı. Halbuki o, ötən mövsüm bundesliqada 22 oyunda yalnız 11 qol vurmuşdu. Bu fenomenal performansla Girassi adını bundesliqa tarixinə yazdırdı. Belə ki, indiyə qədər ilk 7 tura bu qədər qol vuran olmamışdı. Əvvəlki rekord 2020/21-də 7 tura 11 dəfə fərqlənən Levandovskiyə məxsus idi. Leva həmin mövsümü 41 qolla tamamlayaraq Herd Müllerin “əbədi” rekordunu yeniləmişdi.

Turun sitatı
Uli Höness, “Bavariya”nın fəxri prezidenti: “Etiraf edim ki, ötən mövsümün sonuna yaxın Yulian Naqelsmannın qovulması çox da məntiqli addım deyildi. Bu qərarı mən vermədim, klub verdi. Ümumiyyətlə, Oliver Kanın “Bavariya”nın baş direktoru vəzifəsinə gətirilməsi əvvəlcədən yanlış addım idi. Kan işinin öhdəsindən gələ bilmədi. Mən bunu anlayan kimi Rummenigge ilə birlikdə vəziyyəti düzəltməyə başladıq”.