İsveçdə azərbaycanlı azarkeşlərə qarşı ayrı-seçkilik olub
«Qarabağ”ın Avropa Liqasında göstərdiyi oyun və qazandığı nəticələr, təbii ki, hamımızı sevindirir.
Lakin təəssüfləndirən məqamlar da var. Bakıda keçirilən ilk oyunu tribunadan izləyən azarkeşlərin sayında azalma olduğu barədə danışmışdıq. Halbuki ölkəmizi Avropa arenasında təmsil edən komandanın oyunlarına marağın daha yüksək olacağını gözləyirdik. «Qarabağ» rəsmiləri azarkeş sayı ilə bağlı hansısa problemin olmadığını, bilet qiymətlərinin adamların maddi imkanlarına uyğun müəyyənləşdirildiyini deyir. İsveçdəki oyundan əvvəl də 43000 yerlik «Ullevi”yə çoxlu «Qarabağ» azarkeşinin gələcəyi gözlənilirdi. Əslində oyun ərzində bəzi məqamlarda azərbaycanlı azarkeşlərin dəstək, şüar baxımından yerli azarkeşləri üstələməsinin şahidi olduq. Amma yenə də «Qarabağ» tərəfdarları üçün ayrılmış sektor tam dolmamışdı. Oyundan əvvəl klub rəsmi açıqlamasında azarkeşlərimiz üçün 1800 biletin ayrıldığını açıqlamışdı. Biletlərin qiyməti 22 avro təşkil edirdi. Tribunalardakı boşluqlar bizi yenə də qiymətlər barədə düşünməyə vadar etdi. Çünki Avropada yaşayan həmyerlilərimizin «Qarabağ”ın uğurlarını yaxından izlədiyini yaxşı bilirik. Oyundan əvvəl də təkcə azərbaycanlıların yox, digər türkdilli xalqların da komandaya stadiondan dəstək verəcəyi ilə bağlı məlumat almışdıq. Nəzərə alsaq ki, İsveçin 2-ci, Skandinaviyanın 4-cü böyük şəhəri olan Höteborqda çoxlu soydaşımız yaşayır, gözləntilərimiz əbəs deyildi.
Məsələ ilə bağlı İsveçdə yaşayan və oyunu stadiondan canlı izləyən fəal azarkeş Kənan Rüstəmovla danışdıq. Söhbət sırasında məlum oldu ki, isveçlilər yerli azarkeşlərlə «Qarabağ» azarkeşləri arasında aşkar ayrı-seçkilik edib:
«Həkken» qiyməti azərbaycanlılar üçün 22 avro müəyyənləşdirsə də, öz azarkeşləri biletləri 5 avroya əldə etmişdilər. Bu səbəbdən bizim azarkeşlərin böyük hissəsi 5-ci sektorda yerləşmişdilər. Qiymətin baha olması azarkeşlərimizi başqa sektorlara yönəlməyə vadar etdiyi üçün içəri daxil olarkən polislər Azərbaycan bayraqlarını stadiona buraxmamışdılar. Yerli azarkeşlər arasında əyləşən «Qarabağ» azarkeşləri rahat dəstək göstərməkdə çətinlik çəkdilər. Qiymət fərqinin belə böyük olması stadiona gəlmək istəyən bəzi azarkeşləri qəzəbləndirdiyindən stadionda gözləniləndən daha az dəstək var idi. İstənilən halda, tribunalarda «Qarabağ» azarkeşlərinin sayı yetərincə çox idi. Şəxsi müşahidələrimə əsasən deyə bilərəm ki, oyunu tribunalardan izləyən azarkeşlərimizin sayı 1000-ə yaxın idi».
ADİL NƏHMƏTLİ
Digər xəbərlər
