Su, reqlament, ayrı-ayrı futbolçuların imtinası... - Zeynal Zeynalov şikayətləndi
Ölkəmizin çimərlik futbolu yığması Avropa Superfinalında uğursuz çıxışla yadda qalaraq A divizionundan B-yə düşüb.
Yığma İtaliyada təşkil olunan turniri 14-cü yerdə başa vurub. Futbolçularımız ilk oyunda Türkiyəni məğlub etməyi bacarsalar da, ardından Rumıniya, İsveçrə, Fransa və Moldova ilə görüşləri məğlub başa vurublar. Son nəticələrlə bağlı yığmanın baş məşqçisi Zeynal Zeynalovla əlaqə saxladıq.
Mütəxəssis çimərlik futboluna marağın azlığından, oyunçu tapmağın çətinliyindən şikayətlənir. Zeynal Zeynalov turnirin təşkilat komitəsindən də narazıdı:
“Turnir çox aşağı səviyyədə təşkil olunmuşdu. Adi suyu bizə stəkanlarla az-az verirdilər. Belə şeylə ilk dəfə qarşılaşırdım. Turnirin reqlamenti, ümumiyyətlə, yazılmamışdı. Oyunlardan sonra bizi hansı aqibətin gözlədiyini bilmirdik, bizə çox gec məlumat verilirdi. Hətta aşağı diviziona neçə komandanın düşəcəyini də ən sonda bilmişik. Təşkilatçılıq çox aşağı səviyyədə idi”.
Təbii ki, komandanın zəif çıxışını reqlamentlə bağlamaq gülüncdü. Baş məşqçidən məğlubiyyətlərə aparan səbəbləri ətraflı öyrənməyə çalışdıq:
“Yığmaya yeni oyunçular cəlb etməkdə çətinlik çəkirik. Bütün liqaları daim izləyirik, axtarışdayıq. Vaxt tapanda özüm də oyunları canlı izləyib, oyunçu seçməyə çalışıram. Futbolçular çox vaxt klublarla müqavilə şərtlərini və vaxt məsələsini qabardıb yığmada iştirakdan imtina edirlər. İstənilən halda, ümid edirik ki, daha yaxşı heyət formalaşdıra biləcəyik”.
Zeynal bəy əvvəlki açıqlamalarında komandada böyük dəyişikliklərin olacağını demişdi. Söhbət ilk növbədə heyətə yeni oyunçuların cəlb olunmasından gedir. Lakin mövcud problemlər dəqiq nəsə deməyə imkan vermir:
“Planlarımız baş tutub-tutmayacağını zaman göstərəcək. Hər şeyin daha yaxşı olacağına inanırıq. Rəhbərliklə görüşümüz olacaq, bundan sonra hər şey dəqiq bilinəcək. İnkişaf üçün həm turnirlərdə iştirak, həm də yoldaşlıq oyunları vacibdi. Xüsusilə yoldaşlıq oyunlarının keçirilməsinə böyük önəm veririk. Zəif çıxışımızın əsas səbəbini yoldaşlıq oyunları keçirməməyimizdə görürəm. Bu məsələ üzərində işləyirik. Rəhbərlik bu problemin fərqindədi. Ümid edirəm ki, problemlər hamısı aradan qaldırılacaq”.
ADİL NƏHMƏTLİ
Digər xəbərlər
