Həftəsonu İsveç çempionatında 24-cü turun oyunları keçirilib.

“Qarabağ”ın Avropa Liqasının qrup mərhələsindəki rəqibi “Həkken” “Kalmar”a uduzub - 0:1.

Per-Mathias Höqmo səfər oyununda bu futbolçuların xidmətindən yararlanıb: 26. Peter Abrahamsson, 13. Simon Sandberq (22.Tobias Sana, 82), 5. Even Hovland, 4. Aiham Ousou, 21.Tomas Totland, 11. Samuel Qustafson (k), 18. Mikkel Riqaard (16. Pontus Dahbo, 57), 14. Simon Qustafson, 23. Momodou Lamin Sonko (10. Ali Youssef, 57), 24. Amor Layouni (19. Sirdyan Hrstiç, 57), 17. Eduard Çilufya.

Oyunu izləməyərək ancaq nəticəyə baxanlar deyə bilər ki, “Qarabağ”ın rəqibi bu görüşdə zəif oynayıb. Lakin belə deyildi. “Həkken” əla səviyyədə çıxış etdi. Komanda sürətli hücumlar qura bilir. Sol və sağ cinahları çox fəaldı. İsveç təmsilçisinin ən təhlükəli futbolçusu hücumçu Eduard Çilufyadı. Zambiyalı forvard cərimə meydanına ötürülən bütün uzun ötürmələri qəbul edə bilir. Ümumiyyətlə, 24 yaşlı hücumçu “Kalmar”a qarşı əla performans sərgilədi.

Ağdam təmsilçisi bu rəqibi rahatlıqla məğlub edə bilməyəcək. Lakin “Həkken” “Qarabağ”ı uda biləcək potensialda deyil. Rəqib müdafiədə boşluqlar verir. Fərdi keyfiyyətləri üstün olan Zubir, Andrade, Benzya və Juninyo kimi oyunçular “Həkken”in arxa xəttinə böyük çətinliklər yaradacaq. Hər halda, hadisələri qabaqlamağa gərək yoxdu. Nəyin necə olacağını zaman göstərəcək. Lakin isveçliləri də gözümüzdə böyütməyə və onlardan qorxmağa dəyməz. Höqmo Qurban Qurbanovun komandasının hücumlarının qarşısını almaq barədə daha çox düşünməlidi. Onu da xatırladaq ki, “Həkken” hazırda 47 xalla 3-cü pillədə qərarlaşıb.

İLKİN SULTANLI