“Zaqatala”nın iki qabonlusu var
1-ci liqanın iddialılarından "Zaqatala" son günlərdə heyətinə iki qabonlu cəlb edib.
Artıq futbolçular debüt imkanı da qazanıblar. Adətən, yerli futbolçulara üstünlük verən bölgə təmsilçisində afrikalı oyunçuları görmək sürpriz oldu. Bununla bağlı "Zaqatala"nın baş məşqçisi Rüstəm Məmmədovun fikirlərini öyrəndik:
"Bildiyiniz kimi, heyətimizdə kasadlıq var. Heç cür yerli oyunçu tapa bilmədik. 1-ci liqada çıxış edə biləcək bütün futbolçular transfer olunub. Belədə rəhbərliyə xaricdən futbolçu almaq xahişimizi bildirdik. Sağ olsunlar, istəyimizi dəstəklədilər. Qabonlu futbolçular forvarddı. Bunlar 26 yaşlı Steyn Essono və 20 yaşlı Uoren Lloyddu. Sonuncu Qabonun U-23 millisinə də cəlb olunur. Deməzdim ki, gəlmələr yerli oyunçulardan çox üstündü. Amma istəklidilər və potensialları böyükdü. Hələlik 8 gündü bizimlə birgədilər, uyğunlaşma baxımından problem yoxdu. Kollektivlə qaynayıb-qarışmaqdadılar. Bu bizim üçün ilk uğurdu. Düşünürəm ki, oyundan-oyuna onların faydalarını görəcəyik. Hər biri gücümüzə güc qatacaq".
Baş məşqçi səfərdə "Difai Ağsu" ilə heç-heçə etdikləri oyun haqda da danışdı:
"Səfərdə oynasaq da, pis çıxış etmədik. Üstün futbol sərgilədik. Əsas da fasilədən sonra təkqapı oynadıq. Bircə qol gəlmədi. Komandamın oyunundan razı qaldım. Amma bu hələ görmək istədiyim deyil. Düşünürəm ki, iki-üç turdan sonra inkişaf görünəcək".
ABDULLA İSMAYILOĞLU
Digər xəbərlər
