Samir Əliyev haqlıdı, amma… - U-21-in səviyyəsini necə artırmaq olar?
Xəbər verdiyimiz kimi, U-21 yığmamız seçmə mərhələyə uğursuz başlayıb.
Gənclər səfərdə serbiyalı həmyaşıdlarına iki top fərqi ilə yenilib. Bəs U-21-in daha yaxşı nəticəyə nail olmaq imkanı varmı? Qarşıdakı seçmə oyunların perspektivi necə görünür? Bu suallar üzərində düşüncələrimi bölüşməmiş komandanın baş məşqçisi Samir Əliyevin “Futbol+”ə və başqa qaynaqlara verdiyi açıqlamaları ümumiləşdirək:
"Səfərdə oynasaq da, vətənə sərfəli nəticə ilə qayıtmaq istəyirdik. Amma alınmadı. Rəqib bizdən üstün oldu. Serbiyalılar standart vəziyyətlərdə dominantlıq edirdi. Elə qolları da həmin vəziyyətlərdən buraxdıq. Ustalıq səviyyəsi özünü göstərdi və rəqib qalib gəldi. Mənim rəhbərliyimi altında ilk dəfə seçmə mərhələdə oynayırdıq, heyətimizdə də bu həyəcanı ilk dəfə yaşayan oyunçular var idi. Buna rəğmən, komandam meydanda mübarizə apardı, döyüşdü. Bu xüsusiyyətlərinə görə yetirmələrimə təşəkkürümü bildirirəm. U-21-dəki oyunçuların əksərinin premyer-liqa təcrübəsi yoxdu. Bir çoxu əvəzidicilər liqasında çıxış edir. 1-ci liqadan olanlar da var və həmin yarış yeni başlayıb. Bunları bəhanə kimi demirəm və nəticəyə don geydirmirəm. Uduzmuşuqsa, buna görə cavabdeh mənəm. Amma döyüşərək məğlub olduğumuzu qeyd etməliyik. Çox olmasa da, hücumlara çıxırdıq. Rəqib isə həqiqətən güclü kollektiv idi. Birinci hissədə bütün komponentlərdə onlara uduzurduq. Azərbaycan premyer-liqasında 21 yaşlı futbolçularla bağlı limit aradan qaldırılıb. Əvvəllər ən azı bir futbolçu meydana çıxırdısa, digəri ehtiyatda qalırdı. İndi isə çətinlik çəkirik. Çünki biz premyer-liqaya yox, 1-ci liqaya və əvəzedicilərin turnirinə baxacağıq. Premyer-liqada 3-4 futbolçumuz var. Yaxşı və ya pis oynasalar da, istər-istəməz dəvət edirik. Oyunçu sarıdan korluq çəkirik, amma yenə vurğulamaq istəyirəm ki, bu, bəhanə deyil. Ustalıq səviyyəsi yüksək olan futbolçularımız olmasa da, ürəyi olan və meydanda canını qoyan oyunçularımız var".
Vaxtilə U-21 yığmamıza rəhbərlik edən Milan Obradoviç də bir açıqlamasıyla gündəmə gəlmiş, futbol ictimaiyyətinin müəyyən kəsimi onu qınaq obyektinə çevirmişdi. Serbiyalı mütəxəssis premyer-liqada iki gənc futbolçunun oynadılması ilə bağlı limitinin tətbiqini vurğulamışdı. Amma nəinki ikisi oynadılır, hətta biri də aradan qaldırıldı. Təbii ki, həmin limitin zərərli tərəfləri də vardı. Lakin onun götürülməsi daha böyük zərər verdi. Belə ki, ölkənin aşağı yaş qrupları üzrə yığmalarında, əsasən da U-21-də futbolçu qıtlığı var. Samir Əliyev U-21-in “sükanı arxasına” keçdiyi gündən futbolçu seçiminin geniş olmadığını bəyan edir. Bunun nəticəsidi ki, baş məşqçi məcburiyyətdən 1-ci liqadan da oyunçu çağırır. U-21 yığmamız bir neçə toplanışlardan sonra ötən həftə Əliyevin rəhbərliyi altında seçmə mərhələyə qoşuldu. Komandamız səfərdə serblərə 0:2 uduzandan sonra yenə belə deyənlər var ki, yerli məşqçi də gətirdik, nəticə yoxdu. Çoxlarına hələ də çatmayıb ki, problem mütəxəssisdə deyil. Təbii ki, Samir Əliyevin bu postda uzun müddət saxlanılmasının tərəfdarıyam. Ən azı o, futbolçularımızı istənilən əcnəbi baş məşqçidən daha yaxşı tanıyır, rahat dil tapır və oyuna kökləyə bilir. Problemin kökü yuxarıda qeyd etdiyim kimi, çempionatda gənc futbolçu limitini götürülməsindədi. Serbiya millisiylə oyunda Samir bəyin sərəncamında olan 20 futbolçunun əksərinin oyun praktikası yoxdu. Həmin futbolçular klublarında, demək olar, şans qazanmır. Bir çoxu da əvəzedici heyətdə oynayır. Gəlin U-21-in üzvlərinin Misli premyer-liqasının arxada qalan 5 turundakı göstəricilərinə nəzər salaq.
Oyun praktikası sarıdan bəxti gətirən yalnız Rüfət Əhmədovdu. İcarə əsasında "Kəpəz"də çıxış edən müdafiəçi 5 oyunda əvəzlənmədən meydanda olub. 2-ci yerdə Abdulla Rzayev gəlir. O, 425, Veysəl Rzayev 267 dəqiqə oynayıb. Azsaylı legionerlərimizdən Cəlal Hüseynovla Ramin Nəsirli bacardığı qədər komandalarında şans qazanır.
Qapıda dayanan Rustam Samiqullin ötən mövsüm "Sabah"da 1 oyunda şans qazanmışdısa, yeni mövsümdə ehtiyatda qalıb. Seymur Məmmədov da "bayquşlar"ın ehtiyat oyunçular skamyasının sakinidi. Samir Məhərrəmli 5 turda cəmi 14 dəqiqə meydanda olub, Camal Cəfərov 9 dəqiqə şans qazanıb. Digər qolkiper Rza Cəfərov 160, böyük ümidlər vəd edən Mehrac Baxşəli 82 dəqiqə oynayıb. Kapitan Fərid Yusifli də cari mövsümdə debüt etməyib. Yerdə qalan oyunçuların elita təcrübəsi heç yoxdu. Kərbəlayı İsmayıl demişkən, "əşi, hansı birini deyim?"
Sözüm odu ki, gənclərimizin belə göstəricilərlə Avropa futbolu ilə ayaqlaşmaq və rəqib həmyaşıdları üzərində qələbə qazanmaq arzusu xam xəyaldı. Bəs çarə nədi?
İlk növbədə klubların gənclərə şans verməsini, onları əsas heyətdə oynamasını hansısa şəkildə stimullaşdırmalıyıq ki, U-21-in baş məşqçisinin seçim imkanı geniş olsun. İkincisi, nə qədər çətin olsa da, yeniyetmə və gənc futbolçularımızın xaricə axınını sürətləndirmək. Təəssüf ki, hazırda azərbaycanlı futbolçulara tələbat yoxdu, həm də bizimkilər ən müxtəlif səbəblərdən legioner həyatı yaşamağa maraq göstərmir. Baxmayaraq ki, bu il premyer-liqamızdan əvvəlki illərlə müqayisədə daha çox futbolçu xaricə üz tutdu. Amma onlardan yalnız biri – Cəlal Hüseynov U-21-in üzvüdü. Üçüncüsü, 1-ci liqanın səviyyəsinin yüksəltməliyik. Bunun gerçəkləşmək ehtimalı daha yüksəkdi. Ötən mövsümlə müqayisədə yeni “futbol ili”ndə bu çempionatda 1-ci olmaq uğrunda 4-5 komanda mübarizə aparacaq. Klubların sayının artmasıyla səviyyə də müəyyən qədər artıb. Ən azı ilk turdakı nəticələr bunu deməyə əsas verir. 1-ci liqanın keyfiyyəti nə qədər yüksək olsa, Samir Əliyevin pənah yeri var. Bəlkə onda gənclər yığmamızın üzvləri oyun praktikası sarıdan əziyyət çəkməz.
ABDULLA İSMAYILOĞLU
