“Millimizin oyunlarında tribunaların, demək olar ki, boş və səssiz olduğunu, komandamızın uğursuz çıxışını görürdüm. Qərara aldım ki, fanklub yaradım və gənc futbolsevərləri birləşdirərək matçları daha maraqlı edim. Nəticədə ortaya “Milli Holigans” çıxdı. Tribunaya ilk dəfə Heydər Əliyevin 100 illik yubileyinə həsr olunan minifutbol turnirində toplaşdıq. Daha sonra əsas millimizin son iki matçında iştirak etdik. Hazırda sosial şəbəkələrdən istifadə edərək fanklub üzvlərinin sayını artırmağa çalışırıq. Oyunlarda qeydə aldığımız videoları paylaşaraq, həm də millimizi təbliğ edərək insanlarda maraq yaratmaq istəyirik. Sadəcə, millimizi dəstəkləyirik, başqa klublarla işimiz yoxdu. AFFA bizə bilet və avtobuslar təşkil edir. “İdman Könüllüləri və Azarkeşləri” İctimai birliyinin sədri Atanur Cəfərli isə həm mənəvi, həm də maddi yardımı ilə yanımızdadı. Şükür Allaha, iştirak etdiyimiz ilk iki matçda millimizin uğurlarının şahidi olduq. İnanıram ki, bunda bizim fanklubun da payı var. “Milli Holigans” tribunalarda görünməyə davam edəcək”.