Adiyev onu qınayanlara tablonu göstərdi
Seçmə mərhələdə 4-cü qələbəsini qazanan Qazaxıstan yığması Avropa çempionatına qatılmaq baxımından yetərincə yaxşı imkan qazanıb.
"Football-plus.az" xəbər verir ki, Maqomed Adiyevin çalışdırdığı komandanın işini çətinləşdirən əsas məqam odu ki, son 4 oyunun üçü səfərdə olacaq. Rusiyalı mütəxəssis Şimali İrlandiya üzərindəki qələbədən sonra jurnalistlərin suallarını cavablayıb.
"Birinci hissədə heç də pis təsir bağışlamadıq, epizodlarla özümüzü göstərdik. İkinci hissə də normal oldu. Ancaq rəqibin də haqqını vermək lazımdı. Sonda bizi çox sıxışdırdılar, bir neçə yaxşı imkanları oldu. Yaxşı ki təzyiqin öhdəsindən gəldik, qol buraxmadıq. Bununla belə, daha yaxşı müdafiə olunmalıyıq, bu planda “artırmaq” lazımdı".
- Smaorodovun belə erkən əvəzlənməsi planlarınıza daxil idi?
- Yox. Biz planlaşdırırdıq ki, Maks oyunu davam etdirəcək, ancaq onun zədəsi var idi, çox güman, beyin silkələnməsidi. Bu üzdən mübarizəni davam etdirə bilmədi. Fasilədə bunu danışdıq və anladıq ki, istənilən an əvəzlənməsini xahiş edə bilər.
- Və İslambek Kuatın onun əvəzinə meydana çıxması.
- Aydın məsələdi ki, o mövqedə Aymbetovun görünməsi gözlənilirdi. Biz də onun 30 dəqiqə oynaya biləcəyini proqnozlaşdırırdıq. Ancaq həm hesabda irəlidəydik, həm də meydanın mərkəzində sıxlıq yaratmaq istəyirdim. Kuat mərkəzdə etibarlılığı artırdı.
- Bilirsizmi, nə deyəcəklər? Komanda artıq 56-cı dəqiqədən hesabı qorumaq üçün oynadı...
- Qoy, nə istəyirlərsə, onu da desinlər. Hər şey tablodadı.
Qazaxıstan yığmasının müdafiəçisi Marat Bıstrov da Şimali İrlandiya üzərindəki qələbədən sonra maraqlı açıqlama verib:
“Əla kollektivimiz var. Maqomed Adiyev səviyyəli məşqçi və psixoloqdu. Kaş onun bizə nələr dediyini biləydiz. Paltardəyişmə otağında necə danışır, futbolçuları oyuna necə hazırlayır, necə kökləyir... Bu gün bizə dedi ki, kişilər həmişə borcu qaytarır. Bu üzdən biz də azarkeşlərə borcumuzu qaytarmalı, qələbə qazanmalıyıq. Biz də qazandıq, borcu qaytardıq. Elə sözlər tapmaq lazımdı ki, səni cuşa gətirsin. Adiyev hər mərhələdə, hər ay belə sözlər tapır. Bunu izah etmək mümkünsüzdü, paltardəyişmə otağında olmaq və eşitmək lazımdı. Hər kəs bir-birinə, komandaya və qələbəyə inanır”.
Digər xəbərlər
