“Formula-1” komandalarından “Haas” cari mövsümdə topladığı 34 xalla Mühəndiskər kubokunda 7-ci yerdə qərarlaşıb.

Komandanın rəhbəri Günter Ştayner keçilən yola qiymət verib, həmçinin yay fasiləsinə qədər qalan yarışlarla bağlı gözləntilərini bölüşüb.

- Komanda son iki yarışda – Böyük Britaniya və Avstria mərhələlərində xal qazandı ki, bunu da vacib uğur saymaq olar. Bu nəticələrin sizin üçün dəyəri nədi? Komandanın indiki formasını necə xarakterizə edə bilərsiz?
- Nəticələrdən çox razıyam və komandaya görə sevinirəm. Axı mən həmişə demişəm ki, gücümüzə inanmaq lazımdı. Əvvəllər yaxşı nəticələr göstərmişiksə, indi də eyni nəticələri göstərə bilərik. Güman edirəm ki, növbəti iki mərhələ ərəfəsində təmkinimizi qorumaq lazımdı. Çox cəsarətli proqnozlar söyləməyə dəyməz. Hesab etmirik ki, bu səviyyədə çıxışı davam etdirmək asan olacaq. Bunun üçün çoxlu adamın səylə çalışması lazımdı. Ancaq biz çalışırıq və ümid edirik ki, hələ çoxlu xal qazana bilərik. Ondan sonra artıq yay fasiləsində rahatca dincəlmək olar.

- Komandanın Avstriya mərhələsində ideal çalışdığını demək olarmı? Artıq məşqdə yaxşı nəticələriniz ortada idi, həlledici mərhələdə də maşınlarınız mübarizəni sona qədər davam etdirdi, hər iki pilotunuz – Kevin Maqnussen və Mik Şumaher finişə ilk “10-luq”da çatdı.
- Demək olar ki, ideal həftəsonu keçirdik. Hərçənd həmişə daha yaxşısına çatmaq üçün imkan var. Avtoidmanda ideal nəticə odu ki, ardıcıl qələbələr qazanasan, ancaq bu da heç kimə müyəssər olmur. Həqiqətən yaxşı çalışdıq, maksimal dərəcədə keyfiyyət var idi, səhvlərdən qaçmaq mümkün oldu. Ancaq hər aspektdə tərəqqiyə nail olmaq mümkündü və nə vaxtsa fəxri kürsüyə qalxacağıq. Ümid edirəm ki, bu tezliklə baş verəcək. Ümumilikdə komandada hər kəs inadla çalışır, hər kəs işinin öhdəsindən gəlmək əzmindədi, burda heç bir sirr yoxdu.

- Komanda təkcə son iki mərhələdə 19 xal qazanmaqla Mühəndislər kubokunda 7-ci pilləyə yüksəldi. Mövsümün əvvəlki mərhələlərində belə imkanları əldən buraxdığınız hallar olubmu? Düşünmürsüz ki, komandanın hesabında daha çox xal ola bilərdi? Və nəticələrin yaxşılaşdığını nəzərə alıb, 2022-ci il üçün hədəflərinizə yenidən baxmaq fikrində deyilsizmi?
- Hadisələri qabaqlamaq istəmirəm, ancaq 7-ci yerdə möhkəmlənə və ya mövsümü komanda hesabında 6-cı yerdə bitirə bilsək, yaxşı olacaq. Ancaq 6-cı yerdən yuxarı qalxmaq çox çətin olacaq, ona görə ki, başqa komandalar çox güclüdü və bizi yetərincə çox qabaqlayırlar. Aydın məsələdi ki, bütün yarış həftəsonları hər iki maşınımızın finişə ilk “10-luq”da çatdığı son iki mərhələdə olduğu qədər ideal alınmayacaq, ancaq inadkarcasına çalışmaq lazımdı. Bəlkə onda 6-cı yerə yüksələ bilərik. Ancaq indi ilk növbədə hər şey etmək lazımdı ki, Mühəndislər kubokunda 7-ci pilləni qoruyaq.

- VF-22 maşını fərqli trasslarda özünü yaxşı göstərdi. Qarşıdakı Fransa “Qran-pri”si ilə bağlı hansı gözləntiləriniz var?
- Əlbəttə, komanda mübariz əhval-ruhiyyədəi və maşınımız həqiqətən müxtəlif tipli trassların öhdəsindən yaxşı gəlir. Düşünürəm ki, Ciddə və Bakı kimi sürətli trasslarda pis çıxış etdik, Spa və Montsa mərhələləri də məni narahat edir. Ancaq tam əminəm ki, düzgün hərəkət etsək, yenə də xal qazana bilərik. Məhz nə qədər xal olacağını deyə bilmərəm, sadəcə, ümid edirəm ki, yay fasiləsinə qədər olan qalan mərhələlərdə də belə davam edə biləcəyik.

ORXAN