Qadın voleybolçular arasında Avropa çempionatı başa çatandan dərhal sonra onun axtarışına çıxdıq. Axı yığmamızın turnirdə uğursuzluğunun səbəbini axtaran hər kəs – mütəxəssislər, voleybolçular məhz onu nişan verirdi.
Nəhayət, dünən Ataman Güneyligillə danışa bildik. Bəs o, yığmanın indiki, yoxsa artıq sabiq çalışdırıcısıdı. İttihamlarla zəngin müsahibəni oxuyandan sonra bu suala da cavab tapacaqsız.
- Turnirdən sonra Azərbaycan Voleybol Federasiyasında milli komandanın üzvləri ilə görüş keçirildi. Lakin sizi həmin görüşdə görmədik. Səbəb nədi?
- Həmin görüş keçiriləndə mən Türkiyədəydim. Hətta görüşdən xəbərim də olmayıb. Bu barədə federasiyadan soruşsaz, daha yaxşı olar.
- Avropa çempionatından sonra nəticə ilə bağlı federasiyaya hesabat vermisiz?
- Yaxın zamanda hesabatımı göndərəcəm.
- Artıq AÇ arxada qaldı. Sizin yığma ilə keçdiyiniz yola nəzər salsaq, nəyi dəyişərdiz?
- Azərbaycan millisi üçün yeni sistem gətirmişdim. Nəyi dəyişərdim? Hazırda ölkənizdə uşaq voleybolunun vəziyyəti pisdi. Yeni gələcək voleybolçularınız yoxdu. Azərbaycan voleybolunun parlaq dönəmlərində aşağı yaş qrupları ilə maraqlanan olmayıb. Ölkə voleybolunda boşluqlar çoxdu. Mən bunları dəyişərdim. Uşaq voleybolunu inkişaf elətdirərdim. İndi Şahin Çakma bu iş üçün çalışır. Lakin bunun daha əvvəldən edilməsi lazım idi.
- Qrupdan çıxa bilməməyinizi hansı oyunla əlaqələndirərdiz?
- Əslində iki qələbə ilə qrupdan çıxmalıydıq. Çexiya millisini məğlub etdik, onlar daha sonra qrupdan çıxdı. Yunanıstan üzərində qələbə qazandıq. Sadəcə, heyətimiz çox yaşlı idi. Avropa çempionatının ən yaşlı komandasıydıq. 30 yaşın üstündə 7 oyunçumuz var idi. Bəzi oyunçular yeni sistemimə uyğunlaşa bilmədi, bəziləri isə bilərəkdən dediklərimi eləmirdi. Ad çəkmək istəmirəm, amma bəzi oyunçular məni yığmanın baş məşqçisi kimi görmək istəmirdi.
- Yəqin bunu siz hiss etmisiz.
- Əlbəttə! Bəzi oyunçular məni milli komandada görmək istəmirdi. Lakin uğursuzluğun səbəbi bu deyil. Azərbaycan millisində bir neçə oyunçu xaric, başqaları üst səviyyədə deyil. Oynadıqları çempionatlara, karyeralarına baxanda bunu görmək olar. Millinin heyətində olan bəzi 30 yaşdan yuxarı oyunçular hələ indi voleybolu öyrənməyə başlayıb. Mənim də sistemim oyunçulara ağır gəldi. Lakin oyunçulardan mənə gəlib “hoca, səni burda istəmirik” deyən olmadı.
- Bəzi yerli mütəxəssislər turnirə apardığınız heyəti tənqid etdi. Məsələn, Şəfaqət Alışanova, Ülkər Kərimova kimi oyunçular yarışdan kənarda qaldı. Bu oyunçuların turnirə yollanmamasının səbəbi nə idi?
- Tənqid eləyən mütəxəssislərə demək istəyirəm ki, iki ay Azərbaycanda oldum, amma gəlib mənim məşqimi izləyən olmadı. Mən Türkiyənin böyük klublarında çalışmış, dünya çempionu olmuş məşqçiyəm. Demədilər ki, bu adam nə iş görür, biz qala-qala, niyə Ataman Güneyligil yığmanın baş məşqçisi oldu? Özlərinə bu sualı vermədilər. Məndən inciməsinlər, lakin heç kim Azərbaycanda nəsə öyrənmək istəmir. Gəlib məşqlərimi izləsəydilər, onda görərdilər ki, bəzi oyunçuları niyə heyətdən çıxarmışam.
- Polina Rəhimova ilə Odina Əliyevada çəki problemi hiss olunurdu. Həmçinin Polina əməliyyatdan təzə çıxmışdı...
- Polina iyulun əvvəlində əməliyyatdan çıxdı. Amma toplanışa hazır gəlmişdi. Hətta 7-8 kilo da arıqlamışdı. Lakin tam əvvəlki Polina da deyildi. Odina isə turnirə qədər yaxşı formada idi. Ancaq biz Sloveniya toplanışında olanda çəkisində artıqlıq hiss elədik. Yəqin ki, bu da bioloji problemlə bağlıdı.
- Bəs sizin heyət seçiminizə federasiyadan müdaxilə edən oldumu?
- Heç kim mənə deyə bilməz ki, bu oyunçunu turnirə apar, o birini saxla. Bunu mənə desələr, anında istefa verib gedərəm. Mən kiminsə sözü ilə oturub-duran adam deyiləm.
- Şəfaqət Alışanova qəzetimizə müsahibəsində bildirdi ki, Ataman Güneyligil turnirə niyə aparmadığını AÇ-dən qayıdandan sonra deyəcəkdi. Lakin yarışdan sonra baş məşqçi ölkəni tərk elədi və mənə də bunun səbəbini demədi. Elə sizdən soruşaq, səbəb nə idi?
- Xeyr, söhbət belə olmayıb. Bu informasiya yanlışdı. Hansısa böyük səbəb olduğu vaxt mən oyunçularımla danışaram. Şəfaqət heyətdə olmamasının səbəbinin xarakteri ilə bağlı olduğunu düşünürdü. Mən isə ona dedim ki, səbəb bu deyil. Qərar verərkən köməkçilərimlə də məsləhətləşirəm. 6 köməkçim və menecer dedi ki, Şəfaqəti turnirə aparma. Səbəb isə Şəfaqətin meydanda istədiyimizi verməməsi idi. Bu “mən səni sevmədiyim üçün turnirə aparmıram” söhbəti deyil. Sadəcə, Şəfaqət bizə uyğun olmadı. Ülkər Kərimovanı da bu səbəbdən yarışa aparmadım. Hətta turnirə bir gün qalmış daha bir voleybolçunu heyətdən çıxarmaq məcburiyyətindəydim. Buna görə Kseniya Pavlenkonu da siyahıdan sildim. Növbəti mövsüm üçün milliyə gəlsəm, hazırlıqlı oyunçuları seçərəm. Amma mən Azərbaycan millisində işləməyə davam etsəm, bir neçə oyunçu üçün yığmanın qapılarını bağlayacam. Onları heç vaxt milliyə dəvət etməyəcəm.
- AÇ-də libero mövqeyində Bəyaz Quliyevaya yox, Yuliya Kərimovaya şans verdiyiniz üçün də sizi tənqid edənlər var…
- Tənqid edənlər gəlib məşqlərimiz izləyəydi. Kimsə qərarlarımı tənqid edə bilməz. Bu sözlərimi də böyük hərflərlə yaza bilərsən. Mən son qərarımı verirəm və özüm də bunu tətbiq edirəm. İki aydan artıq oyunçularla məşq keçdim, kimi hazırlıqlı gördümsə, onu da turnirə apardım. O tənqid etdi, bu tənqid etdi… Oturduğun yerdən tənqid eləmək asandı, lakin hərəkət, inkişaf eləmək lazımdı. Bax, bu da Azərbaycan voleybolu ilə Türkiyə voleybolunun arasında olan daha bir fərq.
- Milli komandada qalıb-qalmayacağınız haqda nə deyə bilərsiz?
- Önümüzdəki həftələrdə federasiya ilə bu barədə görüşəcəyik.
- Federasiyadan lazımı dəstəyi gördünmü?
- Hazırda federasiyadan bir neçə adamla danışıram. AVF həmişə mənim yanımda oldu və dəstək verdi.
- Azərbaycan voleybolu ilə Türkiyə voleybolunu necə müqayisə edərdiz?
- Çox fərq var. Bu fərqləri, problemləri iki gün təhlil etmək olar. Bir-iki sözlə ifadə edib keçəcəyimiz məsələlər deyil. Türkiyədə 25 il idi ölkə voleybolunun səviyyəsini qaldırmaq üçün işlər gedirdi. Hər mövsüm eyni planla, səbrlə, sevə-sevə oyunçuları öyrədirdilər. Nəticəsini də Avropa çempionluğunu qazanmaqla gördük. Ona görə də bunu sizə bir-iki dəqiqə danışmaqla izah edə bilmərəm.
CAVİD ƏLİYEV