Qarabağ"ın uğursuz çıxışının bir neçə səbəbi var. Onlar zəncir halqası kimi bir-birinə bağlıdı. İlk növbədə onu deyim ki, Ağdam təmsilçisi iki cəbhədə savaşır. Yəni həm avrokubokda, həm də çempionatda oynayır. Bura ölkə kubokunu da əlavə etsək, üç cəbhə yaranır. Bu da istər-istəməz komandada yorğunluq, mənəvi böhran, zədələr və s. yaradır. Ən güclü komanda da bir neçə turnirdə mübarizə aparanda tükənir. İkinci səbəb: ötən mövsümlə müqayisədə bu mövsüm “Qarabağ"ın heyətində zəifləmə və seçim imkanının azlığı var. Baxın, ötən il "köhlən atlar" iki güclü heyət formalaşdırmışdı. "Qarabağ"ın hər iki heyəti, demək olar ki, bərabər səviyyədə idi və baxımlı oyunu, dominantlığı ilə nəticələr qazanırdı. Hazırda iki heyət yoxdu. Ramil, Musa, Ozobiç, Qara, İsmayıl kimi oyunçuların komandadan ayrılması təsir göstərməkdədi. Çünki bu futbolçular daxili çempionatda komandanın əsas fiqurları olmaqla yanaşı, avrokuboklarda da faydalıydılar. Qurban Qurbanov hələ ki istədiyi heyəti formalaşdıra bilməyib. Üçüncü səbəb: Nəriman Axundzadə, Nihad Quliyev kimi gənc, perspektivli oyunçular təcrübəsizlikdən dolayı hələ effekt verə bilmirlər. Amma bu futbolçulara təkcə klubun yox, hamının ümidi böyükdü. Bəzən rotasiya prinsipi ilə bu futbolçulara yer verilməsi nə qədər faydalı olsa da, müəyyən qədər də axsamaya gətirir. Dördüncü səbəb: Veşoviç, Bədavi kimi oyunçuların sıradan çıxması, Rahilin formada olmaması da arxa xətti laxladıb. Səmimi deyim ki, hazırda "Qarabağ"da ən etibarlı müdafiəçi Medinadı. Kolumbiyalı ölkəmizdəki ən yaxşı stopperdi. Desələr ki, ən yaxşı müdafiəçi kimi hansı legioneri “milliləşdirək” çəkinmədən Medinanın adını çəkərdim. Bəhlul nə qədər çalışsa da, onun qədər effekktli deyil. Qısası, müdafiədəki çatışmazlıq və Medinanın yetərincə dəstək almaması da komandanın uğursuzluqlarındandı. Nəhayət, 5-ci səbəb: əvvəlki illərlə, hətta ötən mövsümlə müqayisədə çempionatın səviyyəsi xeyli güclənib. Artıq heç bir komanda asan yem olmaq istəmir. "Sabah”, "Qarabağ", "Neftçi" kimi komandalar 2-ci "5-lik" təmsilçiləri tərəfindən büdrədilir. Hətta premyer-liqanın debütantı "Araz-Naxçıvan"ın necə parlaq oynadığını və döyüşdüyünü görürük. Muxtar Respublika təmsiçisinin "Qarabağ"a necə müqavimət göstərdiyini gördük. Yalnız oyuna əlavə olunan dəqiqələrdə qol buraxdılar. Xülasə, çempionat daha da rəqabəli olub. Hər turun qarşılaşmaları final oyunu kimi keçir".