“Belçikalılarla oyun çox çətin olacaq. Qarşı tərəf böyük ulduzlara malik komandadı və FİFA reytinqində yuxarı pillələrdədi. Onların tanınmış klublarda çıxış edən futbolçuları var. Bizim oyunçuların çoxu isə daxili çempionatda mübarizə aparır. Buna baxmayaraq, rəqibə təslim olmaq fikrimiz yoxdu. Yenə də öz oyunumuzu sərgiləyəcək və hədəflərimizə çatmaq üçün əlimizdən gələni edəcəyik. Düşünürəm ki, Almaniyada keçiriləcək Avropa çempionatına vəsiqə qazanmaq çox çətin olar. Azərbaycan millisinin səviyyəsi o qədər yüksək olmasa da, ildən-ilə yaxşılaşır. Yaxşı oyunçular var. Əsas problem odu ki, seçim imkanı məhduddu. Yəni milliyə namizəd futbolçu sayı azdı”.

“Əlbəttə, ölkə futbolunda milli səviyyəsində peşəkar futbolçu sayı azdı. Təəssüf ki, bu sahədə qıtlıq hiss olunur. Məsələnin yaxşı tərəfi isə bu istiqamətdə ciddi addımların atılmasıdı. Xüsusilə 1-ci və 2-ci liqaların yaradılması futbolçuların gənc yaşlardan peşəkarlaşmasına, özünü formalaşdırmasına müsbət təsir göstərəcək. Bəhs etdiyim islahatlar gələcəyə ümidlə baxmağa imkan verir. Bir neçə il sonra milliyə dəvət olunmaq üçün futbolumuzdakı rəqabətin şahidi olacaqsız”.

“Hər dəfə belə hallar baş verir. Siyahı açıqlanır və hər kəs bir fikir səsləndirir. Təklif edirəm ki, çalışdırıcımıza güvənək və qərarlarına hörmətlə yanaşaq. Fikrimcə, De Byazi öz oyun planına uyğun futbolçularla işləməyə üstünlük verir. Hər baş məşqçi seçimində azaddı ki, bu ona da şamil olunur. Heç kim onun qərarlarını müzakirə etməməlidi. Birincisi, bu doğru deyil. İkincisi, seçimlərinə görə məsuliyyəti De Byazi daşıyır. Qarşıda əldə olunacaq nəticələrə görə baş məşqçi cavab verəcək, başqaları yox...”

“Rəqibdən çəkinmək lazım deyil. Reallığa baxsaq, görərik ki, Belçika əvvəlki gücündə deyil. 2011-ci ildə Bakıda keçirilən görüşdə bizə qalib gələ bilməmişdilər (1:1 – red.) İndiki vəziyyətlərindən daha yaxşı olduqları halda başabaş mübarizə aparmışdıq. Deyərdim ki, qarşı tərəf, sadəcə, kağız üzərində favoritdi. Düzdü, De Byazinin o fikriylə də razıyam ki, onların ulduz futbolçuları var. Amma bu, komandamız üçün, sadəcə, motivasiya ola bilər, ağla qətiyyən başqa fikir gəlməməlidi. Futbolçularımızda özünəinam olsa, çətin işin öhdəsindən gələcəklərinə inanıram. Biz onların yanındayıq və son ana qədər dəstəkləyəcəyik. İnanıram ki, hər biri tam gücünü ortaya qoyaraq qəhrəmancasına mübarizə aparacaq. Onlara çox sevdiyim, tez-tez işlətdiyim bir cümlə ilə səslənmək istəyirəm: ya ümidsizsiz, ya da ümid sizsiz. Ya çarəsizsiz, ya da çarə sizsiz. Milli komandamıza uğurlar arzulayıram. İnşallah, azarkeşləri sevindirəcəklər. Onlar bizim həm ümidimiz, həm də çarəmizdi...”.