“Qarabağ”ın Avropa Liqasında iştirak üçün UEFA-ya təqdim etdiyi iştirak ərizəsini dünən diqqətinizə çatdırdıq.

Siyahıda 2 futbolçunun adını yox idi. Bunlar Marko Veşoviçlə Nəriman Axundzadə idi. Həmin şəxslərin iştirak ərizəsinə salınmaması diqqətçəkən məqamlardan idi. Nəriman son zamanlar “Qarabağ”ın heyətində tez-tez meydana çıxırdı. Veşoviç isə zədələnməmiş “köhlən atlar”ın əsas heyət üzvü idi. Onların adı nə üçün siyahıda yox idi?

“Football-plus.az” məsələ ilə bağlı araşdırma apardı. Bu gün “Qarabağ”ın UEFA-nın rəsmi saytındakı iştirak ərizəsinə diqqət yetirdikdə Nəriman Axundzadənin B siyahısında olduğunu görə bilərik. Marko Veşoviçin adı isə yenə yoxdu. Əldə etdiyimiz məlumata görə, “Qarabağ” futbolçunu siyahıya əlavə edib. Sadəcə, UEFA-nın rəsmi saytında iştirak ərizəsi hələ tam yenilənməyib.

Araşdırmamızdan sonra bəlli oldu ki, Veşoviç Avropa Liqasında “Qarabağ”a kömək edə biləcək. Bəs oyunçunun zədəsi nə vaxt sağalacaq? Klubun mətbuat xidmətinin əməkdaşı Elvar Quliyev bunları söylədi:

“Veşoviç, demək olar ki, sağalıb. Sadəcə, bir müddət fizioterapevtlə işləməlidi. MRT eləmişik. Ayağında qırılan yer bitişib. Tək fizioterapevtlə məşğul olmalıdı, bir qədər güc yığmalıdı. Sonra da komanda ilə birgə məşqlərə qoşulacaq. Düşünürəm ki, sentyabr ayında sıraya dönəcək”.



İLKİN SULTANLI