Robert Levandovski La Liqanın 3-cü turunda – “Vilyarreal”la oyunda komandasının qələbə qolunu vurdu.

“Football-plus.az” xəbər verir ki, 71-ci dəqiqədə rəqib qapısına yol tapan polşalı hücumçu bununla da 4 oyunluq “quru” seriyaya son qoydu. Sən demə, Robert belə hesab edir ki, “Barselona” hücum futboluna yetərincə üstünlük vermir. “Mundo Deportivo” onun aşağıdakı fikirlərinə yer ayırıb: “Biz “Barsa”yıq, bizdən yalnız qələbələr yox, həm də hücum futbolu gözləyirlər. Son vaxtlar belə olmur. Ancaq biz oyunlarda daha çox qol vəziyyəti yaratmaq üzərində işləyirik. Bəzən meydana çıxan hücum oyunçuları yetərli sayda olmur, mən lazımi səviyyədə dəstək almıram... Bu üzdən komanda üçün daha yaxşı qərarlar tapmağa çalışıram. Meydana Ansu və ya Ferran kimi hücum oyunçuları çıxanda komandanın daha çox qol vəziyyəti yaratdığı görünür. Düşünürəm ki, təcrübəm sayəsində yalnız özüm yox, komanda üçün də yaxşı qərarlar verməyə can atıram. Əlbəttə, mən iki yarımmüdafiəçinin arasında olanda müdafiəçilərin işi asanlaşır. Əksər oyunlarda o qədər də çox qol imkanım olmayıb. Son iki oyunda az şans qazanmışam, yetərincə ötürmə almamışam, bu üzdən bəzən özüm təkbaşına təhlükəli vəziyyət yaratmalı oluram. Bütün hallarda səviyyəmi qorumağa çalışıram. Hər növbəti oyunda daha yaxşı olacam. Bu mövsüm çox uzundu. İrəlidə bizi çoxlu oyun gözləyir. Düşünürəm ki, mövsümə necə başlamaq yox, necə bitirmək daha vacibdi”.

Maraqlıdı ki, Robert “Bavariya”da oynayarkən də baş məşqçiyə və həmklublarına yönələn belə iradlarla çıxış edib. Məsələn, polşalı 2021/22 mövsümündə əmin idi ki, oyundaşları ona asmaların sayını azaldıb. Məhz həmin vaxt münhenlilərin baş məşqçisi Yulian Naqelsmann “Frankfurter Allgemeine” qəzetinə müsahibəsində bu məqama toxunmalı olmuşdu. Daha dəqiqi, həmkarımız ona aşağıdakı sualla müraciət etmişdi:

- Deyilənə görə, Levandovski “Bavariya”dan buraxılmasını xahiş edib, sizin ideyalarınız ona inandırıcı görünməyib.
- Yox, bu doğru deyil. Bəzən Levanın özünəməxsus fikirləri olur, ancaq bu tam normal haldı. O müsahibələrinin birində deyib ki, 2021/22 mövsümünün 2-ci yarısında oyundaşlarından daha az asma alıb. Statistikaya baxmışam. Söhbət cəmi üç asma fərqindən gedir, yəni bu amil həlledici ola bilməz.

Polşalı hücumçunun “Barselona”nın heyətində son mövsümdə 46 oyuna çıxdığını, 33 qol və 8 məhsuldar ötürmə ilə yadda qaldığını da xatırladaq.