“İdman” TV ilə “Qarabağ” arasında yaşanan qalmaqalın təfərrüatı hər kəsə bəllidi.

Tərəflər “Olimpiya” ilə səfər oyununun canlı yayınının alınmamasına görə bir-birini qınadı. Bu gün isə “Qarabağ” rəsmi sosial şəbəkə hesabında elan etdi ki, cavab görüşünü “CBC Sport” canlı yayınlayacaq.

İlk oyundan sonra telekanalın rəsmi səhifəsində o da açıqlanmışdı ki, “ən yaxın zamanda klub rəhbərləri ilə AzTV rəhbərliyi arasında görüş keçiriləcək və yalnız bundan sonra ictimaiyyətə açıqlama veriləcək”. Görəsən, bu görüş baş tutdu? Cavab görüşünün yayın hüququnun “CBC Sport”a verilməsi “İdman” TV - “Qarabağ” münasibətlərinə birdəfəlik nöqtə qoydu? Bu yöndə suallarımız çoxdu. Qaranlıq məqamlara aydınlıq gətirmək üçün kanalın direktoru Rövşən Binnətli ilə əlaqə saxladıq.

- “Qarabağ” – “Olimpiya” matçını tamaşaçılara “CBC Sport” təqdim edəcək. Klub rəhbərliyi ilə “İdman” TV arasında görüşdə nələr danışıldı ki, belə qərar verildi?
- Bizim aramızda hansısa görüş olmayıb. Klub, sadəcə, özü oyunun başqa kanalda göstərilməsinə qərar verib. Mən bilmirəm ki, görüş məsələsi hardan çıxdı. Olubsa da, mən burda iştirak etməmişəm.

- Bakıdakı oyunun “CBC Sport”da yayınlanması “İdman” TV” - “Qarabağ” əlaqələrinin üzərindən birdəfəlik xətt çəkdi? Yoxsa qarşıdakı illərdə yenə əməkdaşlıq edə bilərsiz?
- Sabah nə olacağını heç kim deyə bilməz. Biz peşəkarıq. Bunu iddia ediriksə, sabah hər şey ola bilər. Belə problemlər istənilən anda baş verə bilər. Bu, o demək deyil ki, bütün əlaqələr kəsilməlidi. Biz “İdman” TV olaraq, Azərbaycan idmanına xidmət edirik. Bu kanal “İdman Azərbaycan” adı ilə yaranıb. Xırda səhvlər sonrakı planda dayanıb. Bizim üçün əsas məqsəd Azərbaycan idmanına xidmət göstərməkdi.

- Mediada yazılan məlumata inansaq, ilk oyundakı problemin yaranmasında başqa şəxslər də iştirak edib. Əlimizdə sübut olmadığına görə adları açıqlamırıq. Yazılanlara inansaq, bu həm dövlətə, onun kanalına, “İdman” TV-yə və kluba qarşı təxribat olub. Həmin mənbə qeyd edir ki, kanalın burda günahı olmayıb. Siz də düşünürsüz ki, bu, təxribat idi?
- Bəli, məndən bu barədə soruşulmuşdu. Bir məsələ haqda araşdırma gedirsə, onun nəticəsi bəlli olmadan kimisə ittiham etmək, təqsirləndirmək, ictimaiyyətin gözündə düşmən obrazını formalaşdırmaq düzgün deyil. Nə insanlığa, nə də peşəkarlığa sığan bir işdi. Bu, tərbiyədən irəli gələn məsələdi. Mən də belə tərbiyə almamışam. Rəsmi araşdırma gedir. Nəticə hələ açıqlanmayıb. Bu baş verənə kimi nə kiminsə haqda söz söyləyərəm, nə də kimisə məqsədyönlü şəkildə günahlandırıb tənqid hədəfinə çevirərəm. Bu mənin əxlağıma uyğun bir şey deyil. Amma təhlil edən zaman görürsən ki, hadisə təbii şəkildə baş verən çatışmazlığa bənzəmir. Nə baş verib, nədən qaynaqlanıb, necə olub - bu barədə konkret heç nə deyə bilmərəm. Çünki əlimdə hansısa fakt yoxdu.

- Rövşən müəllim, araşdırma nə zaman bitər? Proses kim tərəfindən davam etdirilir?
- Bu suala cavab vermək mənim üçün çətindi. Dəqiq bu barədə heç nə deyə bilmərəm. Araşdırma aparılır, tərəflərin fikirləri öyrənilir. Doğrudumu?

- Bəli!
- Bizə siqnalın gəlib çatmadığını bildiririk. Bunu real olaraq da sübut da edə bilirik. Əlimizdə faktlar var. Əminliklə deyə bilərəm ki, siqnal bizə gəlib çatmayıb. Sloveniya tərəfi və başqa adamlar da iddia edirlər ki, siqnal ideal idi. Bunu nəyin əsasında deyirlər? Bax, bu suala da cavab tapa bilmirəm. İndi onlara da sorğu göndərilib. Fikirləri öyrəniləcək. Ola bilər ki, onların da əllərində dəlillər var. Deyə bilərlər ki, hansı parametrlərlə siqanalı göndərmişik. Siqnalın göndərilməsinin və qəbulunun dərəcələri var. Bunlar texniki məsələlərdi. Bu məsələni ancaq sahənin peşəkarları cavablaya bilər. İndiyə kimi “İdman” TV minlərlə oyunun siqnalını qəbul edib, yayını təşkil etmişik. Parametrlər dəyişmək qalıb, bunlar qarşı tərəfə göndərilib. Sonda biləcəyik ki, kimin gətirdiyi dəlillər reallığı əks etdirir. Amma araşdırmanın nə vaxt başa çatacağını deyə bilmərəm. Çünki təhqiqatı mən aparmıram. Bəli, mən cavabdeh şəxsəm. İstədiyim budu ki, araşdırmanın nəticəsi mümkün qədər tez bilinsin. Bilək ki, bu hadisə nəyin nəticəsində baş verib. Əlimizi vicdanımıza qoyaraq deyə bilərik ki, yayının yüksək səviyyədə təşkili üçün bizdən asılı olan nə varsa, yerinə yetirmişik. Məntiqlə də oyunun tamaşaçılara çatdırılmasını ən çox istəyən tərəf də bizik. Bunu kiməsə sübut etməyə ehtiyac yoxdu. Siz məsələni araşdırmaqla bağlı mənə zəng etmisiz. İstəyərsiz ki, ortaya qoyduğunuz məhsul keyfiyyətli olmasın?

- Təbii ki, yox!
- Bunu istəmək məntiqsizlikdi. İndi biz bu probleminin yaranmasını necə istəyə bilərik? Hamı bizi ittiham edir ki, siqnalı almışıq, amma efirə verə bilməmişik. Bu, absurd fikirdi. Normal düşüncə sahibi heç vaxt bunu iddia edə bilməz. Mən də Azərbaycan vətəndaşı olaraq, dövlətimi çox sevən şəxs kimi istəyirəm ki, bu işdə texniki qüsur yoxdusa, hansısa təxribat varsa, ictimaiyyətə rəsmi şəkildə açıqlansın.

- Rövşən müəllim, bir məsələ qaranlıq qaldı: araşdırmanı kim aparır - dövlət orqanları, AzTV, yoxsa “İdman” TV?
- Rəhbərlik cavabdeh şəxs kimi məndən baş verən proseslərin xronoloji izahını istəyib. Yaşananları olduğu kimi onların diqqətinə çatdırmışam. Amma bundan sonra prosesin hansı istiqamətdə və formatda getdiyindən məlumatsızam. İndi əsas məsələ həqiqətin ortaya çıxmasıdı ki, bunu gözləyirik.

İLKİN SULTANLI