Voleybolçu qadınlardan ibarət yığmanın üzvü Yelizaveta Ruban "Football-plus.az" saytına müsahibə verib.

- Bakıdakı hazırlığınız bu gün yekunlaşdı. Ayyramlıq toplanışı necə dəyərləndirərdin?
- Bosniya və Bakıdakı hazırlığımız çox yaxşı keçdi. Məşqçimiz bizi hər mövqedə yoxladı. Sabah Sloveniyanın Maribor şəhərinə gedəcəyik. Orda yoxlama oyunlarımız nəzərdə tutulub.

- Avropa çempionatında hədəfləriniz nədi?
- Yaxşı oyun göstərmək niyyətindəyik. Hamıya sübut eləmək istəyirik ki, biz qrupun iddialı komandalarından biriyik. İlk məqsədimiz qrupdan çıxmaqdı. İnşallah, daha sonra davamını gətirəcəyik.

- Qrupdakı rəqibləriniz İsveç, Yunanıstan, Almaniya, Çexiya və Türkiyədi. Sizə görə ən çətin rəqib hansıdı?
- Hər bir rəqib qrupdan çıxmaq üçün mübarizə aparacaq. Buna görə də zəif komanda yoxdu. Amma turnirdəki favoritim Türkiyə millisidi. Onlar çox yaxşı voleybol oynayırlar.

- 2014-17-ci illərdə "Telekom"da çıxış etmisən. Sən oynadığın və indiki dövrdəki ölkə voleybolunu necə müqayisə edə bilərsən?
- Həyatımın və karyeramın ən gözəl günləri "Telekom"da keçib. Orda özümü çox yaxşı hiss edirdim. Güclü çempionatımız var idi. Tanınmış voleybolçular Azərbaycanda çıxış edirdi. Təəssüf ki, indi liqamızın səviyəsi çox aşağıdı. İnşallah, nə vaxtsa bu da öz həllini tapar.

- Voleybolun bu vəziyyətini necə düzəltmək olar?
- Sponsorlar çox olmalı, voleybolu sevən insanlar bura maliyyə ayırmalı, səviyyəli legionerlər gətirilməlidi. Bu proseslərdən sonra ölkə çempionatına maraq artacaq. Mən özüm də yenidən Azərbaycanda oynamaq istəyirəm, lakin indiki şərtlər məni qane etmir. Hazırkı durumda xaricdə yaşamaq daha yaxşıdı.

- Rumıniyanın "CSM Lugoj" klubunda çıxış edirsən. Komandanın hazırkı vəziyyəti necədi?
- Ötən il 4 titul qazandıq. Bu, klub tarixində ən böyük nailiyyət idi. Əla komandamız var. Hələ də qazandığımız uğurları düşünürəm və xoşbəxt oluram. Bir il daha CSM Lugoj"da çıxış edəcəm.

- Vaxtilə ölkəmizdə "Zirə"nin şərəfini qorumuş Yovan Krneta ilə ailə həyatı qurmusan. O, sənə bu yolda dəstək olurmu?
- Əlbəttə! Krneta həmişə mənə dəstək olur, daim kömək etməyə hazırdı. Voleybol oynamağım ailəmizdə heç bir problem yaratmayıb. Sadəcə, mənim üçün çətin olan balaca oğlumu görməməkdi.

- Yovan Krneta ilə Azərbaycanda tanış olmuşduz?
- Onunla fiziki hazırlıq üzrə məşqçim vasitəsilə tanış olmuşam. O, Yovanı oyunlarımıza dəvət edirdi. Daha sonra aramızda sevgi yarandı. İndi çox xoşbəxt ailəmiz var.

CAVİD ƏLİYEV