“Açığı, Parisə yollanmaq istədiyim bir şey deyildi. Hər şey çox tez – bir neçə saat ərzində baş verdi. Barselonada uzun illər yaşadığımız üçün həyatımız bir andaca dəyişdi. Yavaş-yavaş Mayamiyə uyğunlaşırıq. Uşaqlarımız bu yaxınlarda məktəbə getməyə başlayacaq. Bura uyğunlaşma gözlədiyimizdən asan və yaxşı keçir. Parisdə bizə çətin idi. Amma burda hər şey başqa cürdü. Qərar verərkən bir çox amilləri nəzərə aldım. Bu məsələ üzərində ailə üzvlərimlə birlikdə çox düşündüm. Sonda hamımız ortaq məxrəcə gəldik. Bütün həyatım boyunca olduğu kimi, ABŞ-a da sevimli işimdən, yəni futboldan zövq almaq üçün gəlmişəm. Buranı ilk növbədə məhz buna görə seçmişəm. Təbii ki, “İnter Mayami”nin nəticələri məni sevindirir. Amma başqa sevindirici məqam ailəmin gündəlik həyatının normal şəkildə davam etməsidi. İlk gündən bu gözəl şəhərdən, fanatların bizə göstərdiyi sevgidən zövq almağa çalışırıq. Özü də bu münasibəti özümüzə qarşı təkcə Mayamidə yox, bütün ölkədə görürük. Bu yaxınlarda Dallas səfərinə yollanmışdıq. Orda özümüzə qarşı inanılmaz bir sevgi və hörmət gördük. Bütün bunlara görə hər kəsə minnətdaram. Futbolun özünə gəlincə, MLS-in və ümumiyyətlə, ölkədə futbolun inkişafı üçün hər cür şərait var. Hər şey çempionatın özündən asılıdı. İndi ABŞ-da futbolu inkişaf etdirmək, yeni səviyyəyə çatdırmaq üçün bəlkə də ən ideal zamandı. Çünki qarşıdakı illərdə iki önəmli turnir (2024 Amerika Kuboku, DÇ-2026) məhz burda keçiriləcək. Ona görə də MLS mütləq irəliyə doğru sıçrayış etməlidi. Əslində bu proses çoxdan başlayıb. Sadəcə, onu başa çatdırmaq lazımdı. Ölkədə futbola maraq heç də az deyil. Struktur da düzgün qurulub. Bu üzdən ABŞ-da yüksək səviyyəli futbol üçün hər şey var”.