Misli premyer-liqasında 3-cü tura start verilib.

“Football-plus.az” xəbər verir ki, “Kəpəz” “Turan Tovuz”a uduzub - 0:2. Matçdan sonra tovuluların çalışdırıcısı Ayxan Abbasovun mətbuat konfransı keçirilib. Sizi mütəxəssisin fikirləri ilə tanış edirik:

- "Araz-Naxçıvan"la oyunun eyni ssenarisi sanki təkrarlandı. Rəqib hücum edirdi, qolları siz vururdunuz. Bu, nə ilə bağlıdı?
- "Kəpəz" iki oyundu ki, əks-hücumlarda oynayır. Gözləyirdim ki, evdə hücuma atılacaqlar. Belə çətin havada mövqe hücumları önəmlidi. Epizodlardan istifadə etdik.

- Sertan Taşkının durumu necədi?
- Rəqib futbolçu ilə toqquşdu. Baldır nahiyyəsindən zədələnib. Ümid edirəm ki, növbəti matça qədər hazır olacaq.

- İkinci hissədəki yorğunluq nə ilə bağlı idi?
- Yorğunluq deyildi, sanki boğulma var idi. Bu ay çətindir, ən isti havalardı. Oyunlar axşam vaxtı olsa, bir az rahat olar.

- Stadionunuzdakı işlər nə yerdədi?
- Növbəti oyunu evdə keçirəcəyik.

- Üç səfər oyunundan altı xal qazanmısınız. Nəticə sizin üçün qənaətbəxşdi?
- Əlbəttə, xal baxımından əladı. Nəzərə alaq ki, bir oyunda "Qarabağ"a uduzmuşuq. Digər görüşlərdə qalib gəlmşik. Bunu qoruyub-saxlamaq lazımdı. Çempionatımız çox çətindi. Komandalar bir-birinə yaxındı, hamı digərini məğlub edə bilər.

- Transfer gözlənilir?
- Bəli, diqqətimizdə olan, danışıq apardığımız futbolçular var. Transfer istəyirik. Ən azı orta xətdə bir futbolçuya ehtiyac var.

- Bütün qolları hücumçularınız vurub. Hücumdakı problemi aradan qaldırdığınızı düşünmək olar?
- Bu gün hücumçulardan razıyıq. Belajdi Pusinin qol vurmasına çox sevindim. Martin Petkov gənc futbolçudur, ondan çox şey gözləyirik. Otto Con zədədən sonra tam bərpa olunmayıb.

- Bu mövsüm hədəf nə olacaq?
- Orta pillələrdə olmaq(gülür). Bu gün premyer-liqa Tovuza ab-hava gətirib. Böyümək üçün liqada qalmalıyıq. Yolumuz çətindi. Tək əsas komanda yox, akademiya, infrastrukturla bağlı işlər gedir. Buna görə də premyer-liqada möhkəmlənmək lazımdı. Birinci liqaya düşsək, işlərimiz yarımçıq qalacaq.

ABDULLA İSMAYILOĞLU