2013-17-ci illər aralığında “Barselona”da çıxış edən, həmin vaxtdan bəri PSJ-ni seçən Neymarın karyerasındakı növbəti dönüşdən xəbərdarsız.

“Football-plus.az” xəbər verir ki, braziliyalı ulduz artıq Səudiyyə Ərəbistanının “Əl-Hilal” klubu ilə “2+1” sxemi üzrə müqavilə bağlayıb. Xatırladaq ki, onun parislilərlə müqaviləsinin müddəti 2025-ci ilin yayında başa çatacaqdı. Son aylarda PSJ-də yaşananları nəzərə alanda Neymarın gedişi həm gözlənilirdi, həm də gözlənilmirdi. Daha doğrusu, gözlənilirdisə də, hər kəs “Barsa”nın üzərində dayanırdı. Amma hücumçu ərəblərin pulunu seçdi…
“Foot Mercato”nun rəqəmləri doğrudusa, Neymar iki il ərzində Səudiyyə Ərəbistanında 300-400 milyon avro qazana bilər. Bəzi kütləvi informasiya vasitələri təmiz 100 milyon avro maaşdan danışır, ancaq bu məbləğə braziliyalının iddia edəcəyi bonuslar daxil deyil. Forvard maaşla yanaşı, bir çox üstünlük də qazanacaq. Onun sərəncamında şəxsi təyyarə olacaq. Kriştiano Ronaldo da belə şərtlər altında oynayır. Portuqaliyalı kimi, ona da rəfiqəsi Bruno Byankardi ilə birgə yaşamaq icazəsi veriləcək. Baxmayaraq ki, onlar arasında nigah münasibətləri yoxdu. Maraqlı məqam budu ki, Səudiyyə Ərəbistanında cütlük arasında nigah olmadan birgəyaşayışa icazə verilmir. Görünür, müsəlman qardaşlarımız ulduz futbolçular naminə lazım gələndə qanundan yan keçə bilirlər. Neymar böyük villada yaşayacaq, onun sərəncamında xidmət personalı da olacaq.

“Əl-Hilal”ın yeni oyunçusu birbaşa maaşdan əlavə hər qələbəyə görə 80 min avro alacaq. Müqavilədə Səudiyyə Ərəbistanını sosial şəbəkələrdə təbliğ etmək ayrıca bənd kimi göstərilib. Braziliyalının rəsmi səhifələrdə bu ölkə haqda yaydığı hər paylaşım ona əlavə 500 min avro qazandıracaq.

Öz aramızdı, krallara layiq belə şəraitdən hansı futbolçu imtina edərdi ki?! Neymar da düşünüb ki, yaşım 31 olubsa, daha bundan yaxşı oynamayacağamsa, klubda atmosfer də idealdan uzaqdısa, lap çox pul qazanmağın əsl vaxtıdı. Səudiyyə Ərəbistanı təmsilçisi ilə müqavilə müddəti bitəndən sonra braziliyalının Avropa futboluna qayıtmaq şansı da var.

Fransa qaynaqlarına inansaq, Neymar hələ də 2025-də, yəni “Əl-Hilal”la müqaviləsinin müddəti bitəndən sonra “Barselona” ilə anlaşacağına ümid edir. O belə hesab edir ki, Çempionlar Liqasının 2020-ci ildəki finalından sonra bir daha bu turniri qazanmaq şansı olmayıb. Bu üzdən “Barsa”da bir daha şansını sınamaq pis olmazdı. Burda daha bir maraqlı məqam var. Deyilənə görə, 31 yaşlı braziliyalı ən yaxın dostlarına deyib ki, Xavi kataloniyalıları çalırdırdığı müddət ərzində bu komandanın formasını geyməyəcək.

Deyəsən, Neymarın transferi Səudiyyə Ərəbistanı klubunun PSJ-yə “ilişməsinin” yalnız ilk epizodudu. “Le Parisien” xəbər verir ki, “Əl-Hilal” Paris klubunun daha iki oyunçusu ilə maraqlanır. Marko Verratti də bu komandanın yolunu tuta bilər. Fabritsio Romano avqustun əvvəlində xəbər vermişdi ki, “Əl-Hilal” italiyalı futbolçu üçün PSJ-yə 45 milyon avro təklif edib, ancaq parislilər transferdən boyun qaçırıb. Bu insayder iddia edir ki, Əl-Xelayfi Markoya görə 50-60 milyon avro qazanmaq niyyətindədi.

“Əl-Hilal” həmçinin qapıçı Keylor Navası alacağına ümid edir. Neymarla Verrattidən fərqli Kosta-Rikadan olan futbolçunun adı ilk turda PSJ-nin iştirak ərizəsinə salınmışdı. Serxio Rikonun ciddi zədəsi fonunda Keylor Donnarummanın əsas əvəzedici kimi qalır. İtaliyalı qapıçı qəfil zədələnsə, Aleksandr Letelye onu lazımınca əvəz edə bilməz. “Transfermarkt”ın 4 milyon avroya dəyərləndiyi Navas ötən mövsümün ikinci yarısını “Nottingem Forest”də keçirib. Keylor İngiltərə klubunun heyətində keçirdiyi 17 oyunda 32 qol buraxıb.

Sitat
Nasser Əl-Xelayfi, PSJ-nin prezidenti: “Qeyri-adi anlar yaşamışıq, Neymar həmişə tariximizin bir hissəsi olacaq. Neyə və ailəsinə təşəkkür etmək istəyirəm. Gələcəkdə ona hər şeyin ən yaxşısını arzulayırıq”.

Neymar 2017-ci ildən bəri PSJ-də ümumilikdə 174 oyun keçirib, 118 qol vurub və 77 məhsuldar ötürmə verib.