İlk oyundakı acınacaqlı məğlubiyyətə baxmayaraq, “Neftçi”nin “Beşiktaş”la cavab görüşü də hər kəsin diqqət mərkəzindədi.

"Football-plus.az" olaraq, oyunla bağlı “ağ-qaralar”ın sabiq müdafiəçisi, karyerasında ərzində Türkiyənin “Antalyaspor” və “Karşıyaka” klublarının da formasını geymiş Mahir Şükürovla əlaqə saxladıq: “Neftçi” Bakıdakı qarşılaşmada məğlub olsa da, pis çıxış etmədi. “Ağ-qaralar” yeni qurulmuş komandadı.

“Beşiktaş” isə ötən mövsümdə olan heyətini qoruyub. İstanbuldakı görüş də çətin olacaq. Azarkeş amili də meydan sahiblərinin xeyrinədi. Mərhələni keçən komanda isə “Beşiktaş” olacaq”.

“Beşiktaş”ın məşqçi korpusunda Şükürova tanış olan sima da var: “Düzdü, Burak Yılmazla birlikdə “Antalyaspor”da çıxış etmişik. İndi o, “Beşiktaş”ın texniki heyətində yer alır. Onunla münasibətlərimiz də çox yaxşıdı. Mənə həmişə hörmət edir. Lakin bu oyun barədə Burakla söhbətimiz olmayıb”.

CAVİD ƏLİYEV