Dünən səhər saat 10-da Heydər Əliyev adına Beynəlxalq Hava Limanında futbolçuların və idman jurnalistlərinin əlindən tərpənmək olmurdu.
Futbolçular “Qarabağ”la “Sabah”ın üzvləri idi. Ağdam təmsilçisi Finlandiyaya HİK-i, Masazır klubu isə Serbiyaya “Partizan”ı məyus etmək üçün yollanırdı. Hər iki kollektiv ilk görüşdə qələbə qazandığı üçün səfərə yüksək əhval-ruhiyyədə yollanırdı. Nə deyirik, təki vətənə də eyni əhval-ruhiyyə ilə qayıtsınlar, iki klubun qrupa düşməklə bağlı macərası davam etsin.
24 nəfərlik idman jurnalistləri qrupu isə İstanbula səfər edirdi. Təbii ki, bunun səbəbkarı “Neftçi”di. Yenilənmiş rəhbərlik “media ilə daha yaxın olacağıq” sözünü tutaraq bu qədər media nümayəndəsini “Beşiktaş”la oyuna aparırdı.
Dediyim kimi, dünən səhər saatlarında hava limanında futbol küləyi əsirdi. Media nümayəndələri futbolçulara uğurlar arzulayır, bəziləri ilə oyunlarla bağlı sual-cavab edirdi. Ənənəvi olaraq Qurban Qurbanov kameralar qarşısına keçərək müsahibə verdi. Murad Musayev isə buna ehtiyac duymadı. Oyunçularla və baş məşqçilərlə şəkil çəkdirən azarkeşlər də var idi. Saat 12 radələrində “Qarabağ” Helsinkiyə, “Sabah” Belqrada, jurnalistlər isə İstanbula yola düşdü...
İstanbul... Avropa ilə Asiyanı birləşdirən möhtəşəm şəhər. İstanbulun gözəliyi haqda nə qədər sözlər, şeirlər, məqalələr yazılıb. Mənin qeydlərimi isə 3-4 min işarəlik qısa yazıya sığışdırmaq mümkün deyil. Söz verirəm ki, vətənə qayıdandan sonra şəhər haqda fikirlərimi dəyərli oxucularımızla bölüşəcəm.
İstanbulun Bəyoğlu rayonunda yerləşən “Sheraton” otelində məskunlaşdıq. Burdan “Vodafone Park”a 20, şəhərin mərkəzi sayılan “İstiqlal” və “Taksim” küçələrinə 10 dəqiqəlik məsafə var.
Stadionun ətrafında hansısa ajiotaj yoxdu. Düzdü, turistlər arenanın giriş hissəsində şəkillər çəkdirirlər. Bu arada “Vodofone Park”ın sütunları Tofiq Bəhramov adına Respublika stadionuna bənzəyir. Ən azı mən oxşatdım. İçərisi isə olduqca möhtəşəmdi. Adam buranın əzəmətindən vahiməyə düşür. Hər yan “Beşiktaş”a aid şəkillər, qrafitilərlə doludu.
Şenol Günəşlə Adrian Mutunun mətbuat konfransı eyni vaxtdı idi. Türkiyəli mütəxəssis öz jurnalistlərinin qarşısına təlim-məşq bazalarında çıxmışdı. Komanda da elə orda məşq etdi. Mutunun mətbuat konfransında isə 24 azərbaycanlı jurnalistdən başqa iki-üç türkiyəli də var idi. Tədbirdə rumıniyalı mütəxəssis olduqca pozitiv görünürdü. Sanki gənc mütəxəssis bugünkü görüşdə qələbə qazanacağına inanırdı. Klubun rəhbərliyi olduqca sakit və pozitiv idi. Həm prezident Fərrux Mahmudov, həm idman direktoru Zaur Əzizov, həm Kamil Məmmədov (hələ ki klubdakı vəzifəsi bəlli deyil, amma yaxın günlərdə təyinatı açıqlana bilər – red.) jurnalistlərlə söhbət edir, zarafatlaşırdılar.
Məşq prosesində diqqətimi bir məqam çəkdi. Adrian Mutu Azər Salahlı, Yuri Matias, Mark Tamaş, Kenni Sayef, Ataa Caber, Emin Mahmudov, Adrian Şinyaşiki, Rəhman Hacıyev və Aaron Olanareni birgə məşq edirirdi. Görünən odu ki, mütəxəssis İvan Brkiçi də onların siyahısına qoşaraq bugünkü matçda meydana buraxacaq. Normalda məşqin ilk 15 dəqiqəsi media üçün açıq olur. Amma jurnalistlər, demək olar ki, yarım saatdan çox müddətdə meydanın kənarından hazırlığı izlədi. Bu halla da jurnalist karyeramda ilk dəfə rastlaşırdım.
İstanbulda sərin hava hökm sürür. Necə deyərlər, əsl futbol havasıdı. “Neftçi” ilə birgə dəfələrlə səfərdə olmuşam. Flaqman, sadəcə, 2021/22 mövsümündə Tiflisdə “Dinamo” ilə görüşdə qələbə qazanıb. Bundan başqa mənim iştirak etdiyim avrokuboklardakı bütün səfər qarşılaşmalarından məğlub ayrılıb. Azərbaycan klubları hələ ki beynəlxalq turnirlərdə Türkiyə təmsilçilərini məğlub edə bilməyib. Ümid edirəm ki, bu gün ilk yaşanacaq və “Neftçi” çətin də olsa, sensasiya imza ataraq mərhələni keçəcək...
İLKİN SULTANLI, Bakı - İstanbul