"Neftçi"nin evdə "Rapid"ə qarşı elə oyun sərgiləyəcəyini heç kim gözləmirdi.


Flaqman son dəqiqədə o qolu buraxmasaydı, Vyanaya tam fərqli ab-havada yollanardıq. Oyunu işıqlandıracaq jurnalist qrupunda yer alan adam kimi şəhadət verə bilərəm ki, "Neftçi" bura qələbə ruhu ilə gəlib. Dünən səhər saat 6-da Heydər Əliyev adına Beynəlxalq Hava Limanında qələbəlik var idi.

Yox, azarkeşlər "Neftçi"ni yola salmağa gəlməmişdi. Adamlar Çempionlar Liqasında pley-offa vəsiqə qazanan "Qarabağ"ı qarşılayırdılar. Bəlkə də məhz bu məqam "Neftçi" camiəsini Vyanada uğur qazanmağa sövq edəcək. Komandanın düşərgəsində yüksək əhval-ruhiyyə hiss olunurdu. Futbolçular bir-biri ilə söhbət edir, zarafatlaşırdılar. Regekampf isə köməkçiləriylə birgə bir kənara çəkilmişdi. Klub prezidenti Kamran Quliyevlə vitse-prezident Elnur Eyvazov gözə dəymirdi. Sən demə, hər ikisi işgüzar səfər üçün İstanbula yollanıb. Amma bu gün Vyanada olacaqlar. Bakı vaxt ilə saat 13.00 radələrində Avstriya paytaxtına çatdıq. Hava limanında izdiham var idi. Vyana Avropaya açılan qapı sayılır. Bu səbəbdən də şəhərdə turist çoxdu, yay aylarında hava limanında izdihamın olması normal haldı. Avtobusla "Flemings" otelinə yollandıq. Bizi otelə gətirən sürücünün türk olması səfərə maraq qatan məqamlardan idi. Komanda bizdən piyada 3 dəqiqəlik məsafədə yerləşən "Arcotel"də məskunlaşıb. Şəhəri gəzmək üçün çox vaxtımız olmadı. Amma Vyana haqda ətraflı danışmağa da ehtiyac yoxdu.

Dunay çayının sahillərində yerləşən şəhər Avropanın ən gözəl paytaxtlarındandı. Burda qədimliklə müasirlik maraqlı şəkildə birləşib. Mən buranı “işıqforlar şəhəri” adlandırardım. Vyanada avtobus, metrobus, tramvay və qatarlardan nəqliyyat vasitəsi kimi istifadə olunur. Şəhərin nəqliyyat sistemində qarışıqlıq olmasın deyə, hər 1-2 kilometrdən bir işıqforlardan istifadə olunur. Təbii ki, Bakıdakı kimi hündürmərtəbəli binalar, dəbdəbəli mollar şəhərin gözəlliyinə əlavə ahəng qatır. Bəlkə də Vyananı gəzəndən sonra buranın möhtəşəmliyini sizə ətraflı izah edə bilərəm. İndiki məqamda “Neftçi”nin oyununa köklənmək vacibdi. Flaqman bura tarix yazmaq üçün gəlib. Bakılılar artıq oyunun keçiriləcəyi “Allianz” stadionunda məşqə də çıxıb. Hava şəraiti idealdı. Stadionun ot örtüyü isə bərbaddı. Avropanın mərkəzində belə qazonun olacağını düşünməzdim.

Hər iki komandanın məşqini izləmək imkanım oldu. Avstriyalılarda müəyyən gərginlik hiss olunsa da, “Neftçi”də vəziyyət fərqlidi. Komanda qələbənin rahatlığını yaşayır. Regekampfın Emin Mahmudovla Kenni Sayefə çox güvəndiyi hiss olunur. Rumın mütəxəssis məşq başlamış onlarla ayrılıqda söhbət etdikdən sonra komandanı meydanın mərkəzinə yığdı.

İlk oyundan öncə çoxları “Neftçi”nin qələbə qazanacağını ağlına belə gətirmirdi. İndi isə pley-offa vəsiqə qazanmaq haqda düşünürük. “Rapid” keçiləsi rəqibdi. Avstriyalılar “Neftçi”nin əzəmətini bilir və ondan ehtiyatlanırlar.

İLKİN SULTANLI, Bakı-Vyana