“Turan Tovuz”la oyundan sonra Qurban Qurbanov mətbuat konfransında futbolçu axtarışında olduqlarını dilə gətirib.

"Football-plus.az"a bununla bağlı maraqlı informasiya daxil olub. “Köhlən atlar” əsas iki mövqeyə futbolçu axtarırlar. Qurban Qurbanovun istəyi sağ cinah vingeri və hücumçudu. Düzdü, komandada forvard kimi oynaya biləcək 4 oyunçu var. Bunlar Redon Cica, Juninyo, Hamidu Keyta və Nəriman Axundzadədi. Adı çəkilənlərin heç bir sırf mərkəz hücumçusu olmadığı üçün bəzi oyunlarda faydalı ola bilmirlər. Bu səbəbdən də mütəxəssis komandaya forvardın cəlb olunmasını istəyib.

Yarımmüdafiənin sağında da ciddi boşluq var. Düzdü, burda da oynaya biləcək 3 futbolçu var. Bunlar Leandro Andrade, Adama Diakabi və yenə Nəriman Axundzadədi. Lakin baş məşqçi onların performansından narazıdı. Burda daha çox Leandro Andrade çıxış edir. Amma Qurban Qurbanov onu pleymeyker kimi sınamaq niyyətindədi. Adama Diakabinin çıxışdan isə nə azarkeşlər, nə rəhbərlik, nə də baş məşqçi razıdı. Düzdü, fransalı “Turan Tovuz”la görüşdə fərqləndi. Düşünmək olar ki, oyunçu performansını günü-gündən artıracaq. Lakin Qurbanov Avropa Liqasının, ən azından Konfrans Liqasının qrup mərhələsində mübarizə aparmağı nəzərə alaraq riskə getmək istəmir. Bu səbəbdən də baş məşqçi əsasən bu mövqenin güclənməsini istəyir.

Artıq klub üçün çalışan menecerlər axtarışa başlayıb. Əsasən Portuqaliyanın əsas və 2-ci liqasında, Liqa 2-də çıxış edən oyunçular “köhlən atlar”ın diqqət mərkəzindədi.