Manenin məsləhətçisi “Bavariya”nı “yıxıb-sürüdü”!
Bilindiyi kimi, tanınmış seneqallı forvard Sadio Mane birillik “Bavariya” macərasının ardından bu yay 37 milyon avro qarşılığında Səudiyyə Ərəbistanı təmsilçisi “Əl-Nəssr”ə transfer olundu.
"Football-plus.az" xəbər verir ki, ötən yay 32 milyon avroya “Liverpul”dan transfer edilən təcrübəli futbolçu Münhen nəhəngində 38 rəsmi oyunda yalnız 12 qol, 6 məhsuldar ötürməlik performans sərgiləyərək ümidləri doğrulda bilmədi. Bu arada 31 yaşlı futbolçunun məsləhətçisi Bakari Sisse Manenin “Bavariya”dan ayrılması barədə gündəmə düşəcək açıqlamalar verib. O eyni zamanda Mane ilə Leroy Sane arasında baş vermiş qalmaqala da toxunub. Xatırladaq ki, ÇL-in 1/4 finalında “Mançester Siti”yə qarşı ilk oyundan sonra Sane paltardəyişmə otağında komanda yoldaşının ünvanına irqi zəmində təhqiramiz ifadə işlətmiş və Mane onun sifətinə zərbə endirərək dodağını partlatmışdı. Bakari Sisseni dinləyək:
“Sadionun satışının futbolla heç bir əlaqəsi yoxdu. Problem yaradan məqam onun maaşı idi. Onun qazancı almanları qıcıqlandırırdı. Onlar afrikalı bir futbolçunun “Bavariya”ya gələrək hamıdan çox maaş almasını anlaya bilmirdilər. Ona görə də mümkün qədər tez onunla vidalaşmağa çalışdırlar. Halbuki onlar Mane ilə vidalaşmaq istədiklərini nə futbolçunun özünə, nə də onun menecerinə dedilər. Rəhbərlik, sadəcə, baş məşqçi Tomas Tuxeli təlimatlandıraraq onu Mane ilə görüşə yolladı. Tuxel Sadioya onun sol cinahda oynayacağını və yalnız 3-cü seçim olacağını dedi. Manenin almanlara nəyisə sübut etməyə ehtiyacı yoxdu. O, ulduz səviyyəsinə “Bavariya”nın yox, “Liverpul”un sayəsində yüksəlib. “Bavariya” bu vəziyyətdə özünü heç də yaxşı tərəfdən göstərmədi. Afrikalıya böyük pullar ödəmək onların xoşuna gəlmədi. Saneyə gəlincə, Avropa futbolu ilə az-çox maraqlanan istənilən şəxs onun necə özündənrazı insan olduğunu bilir. Mane isə bu baxımdan heç bir klubda problem yaratmayıb. Amma Sane bütün çərçivələri aşdı. Aralarındakı münaqişədən 30 dəqiqə sonra Sane səhvini anlayaraq Maneyə üzrxahlıq mesajı göndərdi. Mane isə onun üzrxahlığını qəbul edərək “ümid edirəm ki, bu, bir daha təkrarlanmayacaq. Çünki mən kimliyimlə fəxr edirəm” cavabını yazdı. Məsələ mətbuatda yayılandan sonra Sane günahı boynundan atmağa çalışdı. Rəhbərlik burda da birtərəfli mövqe nümayiş etdirərək Maneni bir oyunluğa cəzalandırdı. Amma məsələnin ciddiliyini nəzərə alsaq, Mane bu olayda günahkar tərəf olsaydı, daha böyük cəza ilə qarşılaşardı. Manenin dərisinin rəngi Saneni narahat edirdisə, deməli, rəhbərliyi də narahat edirdi! Manenin klub tərəfindən 500 min avro məbləğində cərimələnməsi yalandı. Onun maaşından, sadəcə, 50 min avro tutulmuşdu”.
Futbolçunun məsləhətçisinin qalmaqallı sözlərindən sonra “Bavariya” rəsmi bəyanat yaymalı olub. Bəyanatda bunlar qeyd olunub:
“Sadio ilə müqaviləni qarşılıqlı şəkildə ləğv etdik. Onun ətrafındakı insanların irqçiliklə bağlı səsləndirdikləri ittihamlar doğru deyil. Eləcə də baş məşqçimiz Tomas Tuxel heç vaxt Maneyə ondan bir daha yararlanmayacağını deməyib. “Bavariya” Sadioya həm insan, həm də futbolçu kimi böyük dəyər verirdi. Təəssüf ki, qarşıya qoyulan ümumi hədəflərə çatmadıq. Futbolda bəzən belə şeylər olur. Sadioya yeni klubunda uğurlar arzulayırıq”.
Digər xəbərlər
