PSJ-nin forvardı Kilian Mbappe ilə bağlı xəbərlər yenə də ildırım sürəti ilə bir-birini əvəz edir.

“Football-plus.az” xəbər verir ki, çox güman, bu “sabun operası” ünlü fransalı hücumçunun “Real”a transferi yekunlaşana qədər davam edəcək. Ən son xəbərlərdə qeyd olunur ki, 24 yaşlı futbolçunun anası və meneceri Fayza Lamari Madrid nəhənginin rəsmiləri ilə əlaqə saxlayaraq onlara belə desək, 250 milyon avro hazırlamağı məsləhət görüb. Mbappenin anasının fikrincə, transfer “Real”a məhz bu məbləğə başa gələcək. Madrid klubu bu transferi mümkün qədər tez, avqustun 11-də başlayacaq İspaniya çempionatının startına qədər tamamlamaq istəyir. “Real” əvvəlcə Mbappenin daha bir il PSJ-də qalmasının əleyhinə deyildi. Amma indi “blankos”un mövqeyi dəyişib. “Real” rəsmilərinin fikrincə, Mbappe gələn yay azad agent statusu alsa, premyer-liqa klubları ona daha sərfəli təkliflər irəli sürəcəklər. Premyer-liqa klublarından söz düşmüşkən, İngiltərə mətbuatının yazdığına görə, “Liverpul” bu futbolçunun birilliyə icarəyə götürülməsində maraqlı deyil. Amma “Çelsi”nin Fransa yığmasının hücumçusuna marağı davam edir. “Daily Record” nəşrinin iddiasına görə “Çelsi”nin sahibi Todd Bouli PSJ-dəki həmkarı Nasser Əl-Xelayfi ilə danışıqlar aparıb. Londonlular Mbappeyə görə müəyyən məbləğdə təzminat ödəməklə yanaşı, qarşı tərəfə bir futbolçunu da göndərməyə hazırdılar. Əslində xəbərdə qeyd olunur ki, Əl-Xelayfi daha öncə “Əl-Hilal”ın təklifini qəbul etdiyi kimi “Çelsi”nin də təklifini qəbul edib. Sadəcə, Mbappenin özünü razı salmaq çox çətin məsələdi!

Bu arada transfer dedi-qoduları davam etdiyi bir müddətdə Mbappe sosial şəbəkədəki səhifələrində qəribə bir paylaşım edib. O, üzərində “9” rəqəmi qeyd olunmuş 3 oyun kartının şəklini paylaşıb. Bu kombinasiya 999 kimi qəbul olunur və bu rəqəmin numerologiyada xüsusi mənası var. “Astrocenter” saytının açıqlamasına belə qeyd olunur: “Mələklər nömrəsi olan 999 onu göstərir ki, insanın həyatda əldə etdiyi uğurlu bir dönəm yekunlaşmaq üzrədi. Yəni həmin insanın həyatında indi baş verən önəmli hadisə başa çatmaq üzrədi”.

PSJ rəhbərliyi isə hələ də öz fikrində qalır ki, Mbappe onlara verdiyi sözün üstündə durmaq istəmir. “RMC Sport”un iddiasına görə, parislilər ötən ildən bəri Mbappenin ağzından klubu azad agent statusunda tərk etməyəcəyi ilə bağlı çıxan ifadələrin sayını hesablayıblar. 8 belə hal aşkarlanıb! Parislilərin iddiasına inansaq, Mbappe müxtəlif media orqanlarına məhz 8 dəfə klubu pulsuz tərk etməyəcəyini deyib. Adı dillərdən düşməyən futbolçu hələ də fərdi şəkildə məşqlərini davam etdirir.

Xatırladaq ki, PSJ bir nömrəli ulduzunu əsas komandadan kənarlaşdırıb və üstəlik onu transferə çıxarıb. Paris nəhəngi bu yay Mbappeni sata bilməsə, o, gələn yay klubu pulsuz tərk edəcək.