Ötən həftə cümə axşamı günündə Konfrans Liqasının 2-ci təsnifat mərhələsində səfərdə “Jelezniçar”la heç-heçə edən “Neftçi” dünən günortadan sonra vətənə qayıdıb. Komandaya ikigünlük istirahət verilib. Sabah isə “ağ-qaralar” cavab görüşünün hazırlığına start verəcək. Adrian Mutu məşqlərin BOS-un əsas meydanında keçirilməsini istəyib.

Bildiyiniz kimi, “Jelezniçar” – “Neftçi” matçı çox sərt məcrada keçdi. Hətta ilk hissənin sonlarında futbolçular arasında böyük qalmaqal yaşandı. Bu, efirdən gördüklərimiz idi. Görəsən, stadionda başqa hadisələr yaşanıb? Ümumiyyətlə, səfər çərçivəsində “Neftçi”nin başına hansısa maraqlı hadisə gəlməyib? Suallarımızı klubun Media, Marketinq və İctimaiyyətlə Əlaqələr Departamentinin rəhbəri Rüstəm Allahverdiyevə ünvanladıq: “Səfər zamanı xüsusi nəsə baş vermədi. Gözəl ab-hava var idi. Bütün stadion eyni vaxtda mahnı oxuyaraq komandalarına dəstək olurdu. Çoxdan belə ab-hava görməmişdim. Hansısa insident baş vermədi. Ümumiyyətlə, təhlükəsizliyimiz yaxşı idi. Komandanı, işçilərimizi xüsusi nəzarətdə saxlayırdılar. 24 saat təhlükəsizliyimiz qorunurdu. Hətta otelimizin qarşısında polis bizi qoruyurdu. Sakit şəkildə oyunumuzu oynadıq və ölkəmizə qayıtdıq”.

İLKİN SULTANLI