"Qəbələ" bu gün Konfrans Liqasının 2-ci təsnifat mərhələsində Cənubi Kipr təmsilçisi "Omoniya" ilə qarşılaşacaq. Qəbələ şəhər stadionunda keçiriləcək tarixi matça dəqiqələr qalıb.

"Football-plus.az"ın Qəbələyə ezam olunan müxbirinin məlumatına görə, şəhərdə ab-hava o qədər də ürəkaçan deyil. Düzdü, azarkeşlər tribunalarda yerlərini tutmağa başlayıblar. Onlar "Qəbələ" sən bizim hər şeyimizsən!" şüarları səsləndirirlər. Maraqlıdı ki, qarşılaşmanın başlamasına 30 dəqiqə qalsa da, azarkeşlər üçün ayrılmış oturacaqların təxminən 70 faizi boşdu.

Qəbələnin küçələrində isə beynəlxalq səviyyəli oyunun ab-havası hiss olunmur. İndiyə qədər diqqət çəkən yeganə məqam bir qrup gəncin "Qəbələ, Qəbələ" qışqıraraq stadiona doğru irəliləməsi idi.

Ümid edirik ki, qəbələlilər qarşıdakı dəqiqələrdə matçın əhəmiyyətini nəzərə alıb tribunaları son oturacağa qədər dolduracaq və hakimin final fitinə qədər sevimli komandalarına dəstək olacaqlar.

KƏNAN BAHADIR, Qəbələ