Evren Alkayan U-16-nın çempionluq yoluna işıq saldı, planları açıqladı
Andorrada 16 yaşadək qızlar arasından keçirilən Avropa çempionatı başa çatıb. Turnirin C divizionunda mübarizə aparan millimiz final qarşılaşmasında ev sahibi Andorraya 57:45 hesabı ilə qalib gələrək çempion olub.
Yığmanın bu turnirdəki çıxışı, çempionluq və gələcək planlar barədə baş məşqçi Evren Alkayan ilə əlaqə saxladıq. Təcrübəli mütəxəssis “Football-plus.az” saytına bunları dedi:
"Turnirə çox ciddi hazırlaşırdıq. Təlim-məşq toplanışını da çox yaxşı keçirdik. Yer aldığımız B qrupunda Albaniya, Moldova və Andorra millilərinə qalib gəldik. Gürcüstanla yarımfinal matçımız çətin keçdi. Son saniyələrdə oyunu öz xeyrimizə dəyişə bildik. Məqsədimiz çempionluq idi. Şükürlər olsun ki, buna da nail olduq".
Türkiyəli mütəxəssis planlardan da söz açdı:
"Əsas hədəf aşağı yaş qruplarındakı qızların inkişafıdı. İstedadlı basketbolçular yetişdirmək niyyətindəyik. Buna uyğun da işlər görürük. Fürsətdən istifadə edib Azərbaycan Basketbol Federasiyasına dəstəyə görə təşəkkür etmək istəyirəm. Onlar həmişə bizim yanımızdadı".
CAVİD ƏLİYEV
Digər xəbərlər
