"Mən 15 il öncə Polşada çıxış etmişəm. O zamanla indiki çempionat arasında çox fərq var. Əslində həm bizdə, həm də polşalılarda xeyli dəyişiklik olub. Amma müqayisə etsək, vaxtilə həm yığma, həm də klublar səviyyəsində polşalılarla qarşılaşmalarda darmadağına məruz qalırdıq. Polşa təmsilçiləri bizim üçün kabusa çevrilmişdi. Elə vaxtilə çıxış etdiyim "MKT-Araz" da UEFA kubokunda "Qrotslin"ə yenilmişdi. Məhz ilk dəfə "Qarabağ"ın hər iki oyunda "Visla" üzərində qələbəsindən sonra polşalılar üzərində üstünlüyümüz başladı. Sonra "Pyast", "Legiya" və "Lex"i də sıradan çıxardıq. Hətta sonuncu üzərində darmadağınla qələbə qazanmaqla tarix yazdıq. "Rakuv"un oyunlarını yaxından izləməmişəm. Komanda Çempionlar Liqasında debüt edir. Ağdam təmsilçisinin isə qitəmiqyaslı yarışlarda kifayət qədər təcrübəsi və Polşa klubları üzərində qələbələri var. Məhz bu "Qarabağ"ın üstün tərəfidi. Əminəm ki, Qurban müəllim də Polşa futbolunu yaxından izləyir və rəqibi də kifayət qədər təhlil edib. Sonda mərhələ keçən tərəfin “Qarabağ” olacağına inanır və təmsilçimizə uğurlar arzulayıram".