“Daha əvvəl üç dəfə Polşa təmsilçiləri ilə üz-üzə gəlmişik və hamısından qalib ayrılmışıq”.

“Football-plus.az” xəbər verir ki, bu sözləri “Qarabağ”ın prezidenti Tahir Gözəl “Linkoln” üzərindəki inamlı qələbədən sonra növbəti mərhələdə “Rakuv”la qarşılaşacağımız bəlli olunca deyib.

Əlbəttə, Tahir bəy düz deyir, amma az deyir! Ona çatdırılan statistikada çatışmazlıq var. “Qarabağ” 2010-da “Visla”nı, 2013-də “Pyast”ı, 2020-də - 44 günlük müharibənin başladığı ilk günlərdə “Legiya”nı yolundan kənarlaşdırıb. Ötən il isə Qurban Qurbanovun yetirmələri “Lex”i meydandan necə silib-süpürdüsə (5:1), səsi-sorağı bütün Avropaya yayıldı. İndi polşalı həmkarlarımız həyəcanla “Qarabağ” kabusunun qayıtdığını yazırlarsa, deməli, bildikləri bir şey var. Apteklərdən hərəyə bir “tetrasiklin” də ala bilərlər, nə olar, nə olmaz…

Amma Tahir bəy yəqin onu bilmir ki, bu Polşa təmsilçiləri bizə zamanında necə divan tutublar. Özü də Avropada onlarla indiyə qədər hamıdan çox – 27 dəfə qarşılaşmışıq. Cari avrokubok mövsümünə qədər 7 qələbəmiz, 5 heç-heçəmiz və 15 məğlubiyyətimiz var, topların fərqi isə 28-56-dı. Stajlı azərbaycanlı azarkeşlər “Vidzev”in ikiyə parçalanmış “Neftçi”ni 8:0, “Qutnik”in “Xəzri”ni 9:0, “Zaqlebiye”nin “Viləş”i 4:0, LKS-in “Kəpəz”i, “Lex”in “Xəzər Lənkəran”ı 4:1 hesabıyla məğlub etməsini unutmayıblar. Heç unuda da bilməzlər. Tahir bəyin həmvətənlərinin dilində yaxşı bir məsəl var: “Keser döner, sap döner, gün gelir, hesap döner”. Polşalıların bizə yaşatdıqları acıları eynən özlərinə qaytarmağın tam zamanıdı. Özü də bu dəfə bəxtimizə ÇL təcrübəsindən məhrum “Rakuv” düşüb. Düzünə qalsa, mən “Qarabağ”ın tərəfində olan ən önəmli üstünlük kimi də elə zəngin avrokubok təcrübəsini görürəm. Yoxsa gücə qalsa, bu gün sponsorsuz qalan Azərbaycan premyer-liqası Polşa ekstraklasasından güclü deyil. UEFA-nın əmsallar cədvəlində də Polşa 22-ci yerdədi, biz 29-cu yerdə...

ORXAN