İsveç "Yurqorden"i ilə 3 illik müqavilə bağlayan Musa Qurbanlı dünən rəsmən debüt etdi.

Təəssüf ki, milli üzvünün "siftə"si düşərli alınmadı. Ölkə çempionatının 17-ci turu çərçivəsində lider "Elfsborq"a qarşı keçirilən görüş 0:4 hesablı darmadağınla bitdi. Nədənsə, bəzi idman yazarları və azarkeşlər dərhal Musanı tənqid etməyə başladılar. Niyə? Görünür, hücumçunun tərəfdarları, demək olar ki, hər matçda qol vurmasına öyrəşib. Üstəlik, onun sabiq klubu "Qarabağ" sonuncu dəfə 2017-ci ildə Çempionlar Liqasının qrup mərhələsində "Çelsi" (İngiltərə) tərəfindən darmadağın edilib - 0:6.

Əlbəttə, Musadan gözləntilərin yüksək olması normaldı. Qurban Qurbanovun oğlu ötən mövsüm premyer-liqada şou göstərdi. Bəlkə də atası ona daha çox şans versəydi, lider Ramil Şeydayevi qabaqlayacaqdı. Ola bilsin, bu üzdən çoxları Musanı Çempionlar Liqasının 1-ci təsnifat mərhələsində "Linkoln"u darmadağın edən (1:6) "Qarabağ"dan ölkə çempionatında diz çökən "Yurqorden"ə keçidinə görə qınayır. Amma mövzumuz bu deyil. Sual vermək olar ki, "Yurqorden"in ağır məğlubiyyətinin səbəbkarı həqiqətən Musadı? Odusa, sözünüzə qüvvət, beşini də deyin! Bəs deyilsə?

Qurbanlı qarşılaşmaya bir gün qalmış "alfonbladet.se" nəşrinə açıqlamasında bunları demişdi:

Beləliklə, Musa sözügedən matçın 58-ci dəqiqəsində meydana çıxdı. O vaxt ki, artıq rəqib 3:0 hesabı ilə öndə idi. Oyun başlar-başlamaz, daha dəqiq desək, 3-cü dəqiqədə "Elfsborq"un futbolçusu Aleksandr Bernhardsson (9 oyun, 4 qol, 1 məhsuldar ötürmə) hesabı açdı. Sürpriz "Yurqorden"in bütün planlarını pozdu. Buna oyunu izləyən hər kəs qarşıdakı dəqiqələrdə şahidlik etdi. Daha sonra danimarkalı Ceppe Okkelsin (15 oyun, 5 qol, 3 məhsuldar ötürmə) 21 və 42-ci dəqiqələrdə vurduğu qollar Musanın komandasını çökdürdü. Millimizin üzvü meydana çıxanda komandası fiziki və psixoloji cəhətdən çox yorğun idi. Bunu anlamaq üçün futbolçuların jest və mimikalarını görmək kifayət edirdi. "Yurqorden" hücuma keçməyə macal axtarırdı ki, islandiyalı Sveyn Aron Qudconsen (15 oyun, 4 qol) "ölümcül" zərbəni vurdu. Onun 66-cı dəqiqədə rəqibin qapı torunu sirkələməsi matçın taleyini həll etdi. Bundan sonra meydanda, sadəcə, 5-ci qolun qarşısını almaq üçün tər tökən "Yurqorden" gördük.

Hətta Musa matçın 90+4-cü dəqiqəsində İsveç çempionatında ilk qolunu vura bilərdi. Lakin komanda yoldaşları topu çox gec ötürdü. Artıq elfsborqlular özünü müdafiə xəttinə çatdırmışdı. Nəticədə qapıya qədər irəliləyib zərbə vuran futbolçu hədəfi dəqiq nişan ala bilmədi. Hakimin final fitinə saniyələr qalmış Musanın qapı önündə pərişan vəziyyətdə diz çökdüyünü izlədik.

Göründüyü kimi, qol müəlliflərinin statistik göstəriciləri də sözünü deyir. Ümumiyyətlə, "Elfsborq" 16 oyundan sonra 39 xalla turnir cədvəlinin zirvəsinə yerləşməsini məhz həmin futbolçulara borcludu. Reallıq budu ki, Musanın rəqibləri Azərbaycan premyer-liqasındakılardan daha güclüdü. Bu üzdən eyni nəticələrin tezliklə təkrarlanmasını gözləmək sadəlövhlük olar...

Beləliklə, sabiq "Qarabağ"lı meydana çıxanda hesab 0:3 idi. Düzdü, onun təsəlli qolu həm isveçli, həm də azərbaycanlı azarkeşlər üçün "səhrada su" effekti verə bilərdi. Alınmadı və bunu anlayışla qarşılamaq üçün xeyli səbəb var. Ona kömək edə biləcək futbolçuların hesab üzündən bitkinliyini qaneedici saymaq məntiqli deyil? Musadan daha yaxşı futbolçuların Azərbaycan çempionatında debütü həmişə uğurlu alınıb?

"Yurqorden"in sözügedən oyunun nəticəsini paylaşdıqdan sonra yaşananları da qeyd edim. Belə ki, posta 444 nəfər reaksiya verib. Onlardan 118-i "əsəbi", 192-si "məyus"du. 95-i isə məsələni "normal" qarşılayıb. Maraqlıdı ki, yazılan 200-dən çox rəyin demək olar hamısı həvəsləndiricidi. Azarkeşlər bundan sonra daha uğurlu olması üçün komandanı motivasiya etməyə çalışıblar. Bir çoxları fikirlərində klubun rəmzlərindən olan mavi, qırmızı və göy rəngli ürəklərdən istifadə edib. Fikirlərin arasında rəqib komandanın tərəfdarlarının alçaldıcı zarafatları və ya təhqirlərinə də rast gəlmək olmur.

Sözümün canı odu ki, darmadağın olan komandanın azarkeşləri bu qədər anlayışlıdısa, 21 yaşlı gənc futbolçumuza biz niyə anlayış göstərməyək? Tənqid etməyə tələsməyimizin səbəbi nədi? Futbolçu özü də bunu hiss edib ki, oyundan sonra sosial şəbəkə hesabında etdiyi paylaşımda bildirib:


Əminəm ki, həmin narazılar qolların hansı dəqiqədə vurulduğunu belə bilmir. Bu üzdən yuxarıda qeyd olunan şəraitdə meydana çıxan adamı qınamaq asan olmamalıdı. Ən azı ümid edə bilərik ki, Mahirlə bağlı məlum hadisələr yaşanmayacaq. Yaşansa, söz verirəm, birinci daşı mən atacam.

İndi "Yurqorden"i Konfrans Liqasında sınaq gözləyir. İsveç təmsilçisi iyulun 27-də İsveçrə "Lutsern"i ilə "Stokholm Arena"da qarşılaşacaq. Gəlin, Musaya uğur arzulayaq. Bəlkə futbol mütəxəssisləri gələcəkdə onun haqda danışarkən 2023/24 mövsümünü "əfsanənin doğuşu" kimi qiymətləndirəcək?

KƏNAN BAHADIR