Barış Şimşək qış toplanışını ölkə xaricində keçirməyi düşünür
Futbol ictimaiyyətinin 2023/24 “futbol ili”nə ciddi hazırlaşdığını bilirik.
Klublar daha yuxarı pillələr uğrunda mübarizə aparacaqsa, əlaqədar qurumlar daha peşəkar xidmət göstərmək istəyir. Komandalar fasilə dönəmini məşqlər və yoxlama görüşləri keçirərək dəyərləndirir. Bura qədər hər şey yaxşıdı. Qəribə odu ki, qarşılaşmaları idarə edəcək hakimlərlə bağlı hansısa rəsmi məlumat qeydə alınmayıb. Ötən mövsüm bir çox klubun ədalət təmsilçilərindən narazı qaldığını bilirik. Xatırlayırsızsa, baş məşqçilər və bəzi futbolçular həm mətbuat konfranslarında, həm də mediaya fərdi açıqlamalarında, azarkeşlər isə sosial şəbəkələrdə idarəçiliklə bağlı xeyli şikayətlənmişdi. Qəzetimizin “Hakimlərin mühakiməsi” rubrikasında biz də bu mövzuda jurnalist yanaşması ilə çıxış etmiş, iradlarımızı bildirmişdik.
Bütün tənqidlərdən sonra gözləmək olardi ki, artıq 5 ildi ölkə xaricinə yollanmayan hakimlər bu dəfə hazırlıq prosesinə daha ciddi yanaşacaqlar. Bəllidi ki, 2-ci liqanın təsis edilməsi, Region Liqası və əvəzedici komandaların çempionatı kimi matçların idarə edilməsi daha peşəkar yanaşma tələb edəcək. İlk mövsümdə işlərin daha çətin olacağını nəzərə alsaq, ədalət təmsilçilərinin hazırlığı yönündə böyük addımların atılması vacib idi. Lakin yeni “futbol ili”nin başlamasına iki həftə qalmasına baxmayaraq, hələ də hansısa addımdan söhbət getmir. Bununla yanaşı, bəzi qeyri-rəsmi məlumatlar ictimaiyyətdə çaşqınlıq yaradır. Hakimlərin gah Türkiyəyə yollanacağı, gah da yetərli maliyyə olmadığından ölkə daxilində toplanış keçirəcəyi tirajlanır. Bəs həqiqət necədi? “Qara paltarlılar” yeni mövsümə necə və harda hazırlaşır? Hansısa toplanış nəzərdə tutulub?
Bu suallarla AFFA Hakimlər Komitəsinin sədri Barış Şimşəyə müraciət etdik. Türkiyəli mütəxəssis yay toplanışı haqda "Football-plus.az"a bunları dedi:
“Liqanın başlama tarixini nəzərə alaraq, fitnes məşqçiləri ilə birlikdə planlarımızı qurduq. İyulun 3-də məşqlərə başlamışıq. Hakimlərimiz həftədə 6 məşqlə işlərini davam etdirir. Seminarımızı Bakıda keçirəcəyik. Həm həmişəki təlimçi komandamız, həm də xaricdən gələn ekspertlər bizimlə olacaq”.
Şimşək fasilə dönəmində görülən işləri belə dəyərləndirdi:
“Hazırlıq fitnes baxımından, qeyd etdiyimiz kimi, davam edir. Liqa başlamazdan əvvəl atletik sınaqlar keçiriləcək. Texniki cəhətdən seminar üçün bütün materiallar rəhbərliyim altında və təlimatçılar komandası ilə birgə hazırlanır. Komandamız yayboyu keçirilən bütün turnirləri izləyib. UEFA-nın iclaslarında iştirak etmişəm. Qayda dəyişiklikləri, UEFA-nın yeni təlimatları və təcrübələri üçün hazırlıq görmüşəm. Seminarda bütün bunlar hakimlərə və inspektorlara izah ediləcək”.
Mütəxəssisin dediklərindən anlaşıldı ki, hakimlər bu dəfə də ölkə xaricində toplaşmayacaq. Barış bəy səbəbi belə izah etdi:
“Bir çox ölkə və variantlar üzərində işləmişik. Xaricdə toplanışın müsbət və mənfi tərəfləri var. Hava şəraitinə görə belə toplanışlar qışda daha məntiqlidi. Bir çox ölkələr artıq kənardan hakimlərin yoldaşlıq matçını idarə etməsinə icazə vermir. Bütün variantları nəzərə alaraq qərara gəldik ki, Bakıda şərait daha idealdı. Bundan əlavə, ikinci liqanın yaradıldığını nəzərə alsaq, belə seminarlara mümkün qədər çox hakim və inspektor cəlb etmək lazımdı. Biz xaricdən ekspertləri dəvət edərək, ötən il olduğu kimi Bakıda ətraflı seminar keçirməyə üstünlük verdik. Ancaq qış toplanışında vəziyyət fərqli olacaq”.
Maraq üçün qeyd edək ki, hakimlərin ölkə xaricində keçirilən son təlim-məşq toplanışı 2018-ci ilin qışına təsadüf edib.
KƏNAN BAHADIR
Digər xəbərlər
