“Barselona” həmişə olduğu kimi, yenə də diqqət mərkəzindədi. Bu komandanın dünyanın dörd bir yanında yaşayan azarkeşləri problemlərə son qoyulacağı günü səbirsizliklə gözləyirlər. Amma...

"Football-plus.az" xəbər verir ki, İspaniya La Liqasının rəsmi informasiyasına görə, “Barselona” hələ ki yalnız 13 futbolçunu növbəti mövsümdə iştirak üçün qeydiyyatdan keçirib. Bu siyahıya Mark-Andre ter Ştegen, Jül Kunde, Erik Qarsiya, Andreas Kristensen, Pedri, Qavi, Frank Kessye, Ferran Torres, Frenki de Yonq, Ansu Fati, Robert Levandovski, Usman Dembele və Rafinya daxildi. Məhz bu futbolçuların ad-soyadı qurumun saytında yer alıb.
“Barselona” Ronald Arauxo, Aleks Balde, İlkay Gündoğan, İnyiqo Martines kimi vacib oyunçuları, eləcə də bəzi başqalarını qeydiyyatdan keçirməyib. Mövsümün startına qədər klubun sərəncamında hələ 30 gün var. “Barselona” maliyyə problemindən qurtulmaq üçün, çox güman, bəzi oyunçuların satışı hesabına əməkhaqqı fondunu ciddi şəkildə azaldacaq.

Bu arada “Barselona”nın Ter Ştegenlə müqavilə müddətini uzatmaq istəyi haqda xəbər yayılıb. Qapıçının Kataloniya klubu ilə müqaviləsinin vaxtı 2025-ci ilə qədərdi. “Marca” xəbər verir ki, tərəflər müqavilə müddətinin uzadılmasıyla bağlı danışıqlara başlayıb. Almaniyalı qapıçıya 2028-ci ilə qədər müqavilə təklif olunur. “Barsa”nın idman rəhbərliyinin ideyası bundan ibarətdi ki, qapıçı karyerasını bu komandanın heyətində bitirsin. Xatırladaq ki, Ter Ştegen “Barselona”ya 2014-cü ildə keçib. 31 yaşlı qapıçı La Liqanın son mövsümündə meydana çıxdığı 38 oyunda 18 qol buraxıb.

Yeri gəlmişkən, klub prezidenti Xuan Laporta bəzi maraqlı açıqlamalar verib. O, “Barselona”nın “Real”dan üstün olduğunu iddia edib: “Real”la müqayisədə daha yaxşı komandaya malikik, fərdi planda da rəqib üzərində üstünlüyümüz var. Klubun üzvü və azarkeşi kimi yaratdığımız komandadan çox razıyam. İnyiqo Martineslə İlkay Gündoğanı Xavi istəyirdi. Deyə bilərik ki, artıq Viktor Roke də bizim oyunçudu. Düşünürəm ki, bizə sağ cinah müdafiəçisi lazımdı və bunun üzərində işləyirik. Həmçinin orta sahəni gücləndirmək fikrindəyik”.

Təbii ki, Laporta Lionel Messinin “Barsa”ya keçidinin alınmamasına da toxunmalı olub: “Biz razılaşmışdıq, ancaq hər şeyin öz vaxtı var və bəzən iş ritmi hər kəsdə fərqli olur. Müqavilə razılaşdırılmışdı, ancaq La Liqa klubun iqtisadi planını bəyənəndən sonra Messinin atası mənə dedi ki, Leo PSJ-də iki çətin il keçirib, əziyyət çəkib, indi isə təzyiqin az olduğu çempionatda oynamaq istəyir. Tam anlaşılan izahatdı”.

Laportaya müqavilə müddəti gələn ilin iyununda bitəcək Usman Dembele ilə bağlı da sual verilib. Onun dəbbəpulu cəmi 50 milyon təşkil edir, bu yay klubdan gedəcəyi təqdirdə futbolçu və agentləri 25 milyon alacaq, ona görə ki, əvvəlki müqavilə imzalanarkən imzahaqqı ödənilməyib. Laporta Usmanın agentlərinin danışıqlarla bağlı vaxt limiti qoymasından narahatdı, bununla belə, əmindi ki, futbolçu yalnız “Barselona” haqda düşünür: “Dembele baş məşqçiyə, texniki personala və mənə çox əziz olan oyunçudu. Mən onun böyük fanatıyam. Usmanın agentləri ilə danışıq aparmaq çox çətindi. Onun mövqeyinə hörmət edirəm, ancaq hər şey son anda baş verir. Hazırda onu saxlamaq üçün danışıq aparırıq, ümid edirəm ki, məsələ həllini tapacaq. “Barsa” Dembeleyə çox şey verib, o da “Barsa”ya. Son mövsümdə həlledici fiqur idi. Düzdü, zədəsi olub. Hər şeyi qaydasına salmalıyıq. Usman son mövsümdə əvvəlkilərlə müqayisədə yaxşı oynadı. Xavi onun oyununa heyrandı, elə mən də - və agentlər bunu bilirlər. Biz belə əməliyyatlar zamanı tələb olunan məntiqi, sağlam düşüncəni və soyuqqanlılığı itirmək istəmirik. Futbolçu tərəfindən də fərqli təklif var. Ötən il o bizə yardım əlini uzatdı”.
Xanım həmkarımız Laportaya xatırladıb ki, onda olan bilgiyə görə, Dembele klubu iyulun 31-nə qədər qüvvədə olan 50 milyon avroluq klausuranı aktivləşdirməyəcəyindən xəbərdar edib. “Barsa”nın prezidenti də bu xəbəri təsdiqləyib: “Bəli, belədi. Hazırda danışıqlar gedir. “Barsa” Dembelenin xoşuna gəlir və bu bizim üçün böyük uğurdu. Biz onu burda görmək istəyirik. Düşünürəm ki, qalacaq. İstədiyi budu. Ötən il ehtiyatlanırdıq ki, PSJ onu aparacaq, ancaq bu baş vermədi. Usman qalmaq istəyir, düşünmürəm ki, onun başqa komandaya keçmək arzusu var”.