Dünən millimiz AÇ-2024-ün seçmə mərhələsində Estoniya ilə heç-heçə edib - 1:1.

"Football-plus.az" xəbər verir ki, görüşdən sonra AFFA İcraiyyə Komitəsinin bir neçə üzvü və baş katib Sərxan Hacıyev nəticəni müzakirə ediblər. Komitə üzvlərindən matç haqda fikir öyrənmək cəhdlərimiz alınmasa da, Hacıyevlə söhbətləşə bildik.

- Görüş haqda fikirlərinizi bilmək maraqlı olardı...
- Açığı, oyunun nəticəsi o qədər də ürəkaçan olmadı. İlk hissədə komanda yaxşı təsir bağışlamadı. Fasilədən sonra kollektiv toparlandı. Bunun nəticəsində hesabı bərabərləşdirdi. Təəssüflər olsun ki, bundan artığını etmək mümkün olmadı. Lakin mən bunu əvvəlki müsahibələrimdə də demişdim. Qalib gəlsəydik də eyforiyaya qapılmağa ehtiyac yox idi. Gələcəyə baxmaq lazımdı. Futbolun, uşaq futbolunun inkişafı ilə məşğul olmaq lazımdı. Bu yöndə müəyyən işlər aparmalıyıq. Çalışırıq nəsə edək. Böyük futbolda da dəyişikliklər edək. Bilirsiz ki, İcraiyyə Komitəsinin son iclasında müəyyən qərarlar qəbul olundu. Düşünürük ki, bu öz nəticəsini verəcək.

- Sərxan bəy, 1 xal qazandıq, yoxsa 2 xal itirdik?
- Bu oyunda qalib gəlməli idik. Meydana qələbə üçün çıxmışdıq. Qələbə olmalı idi. Təəssüflər olsun ki, alınmadı. Düşünürəm ki, 2 xal itirdik. İstənilən oyunda qalib gəlmək üçün meydana çıxmaq lazımdı. Heç-heçə üçün oynamaq düzgün deyil. Fürsətdən istifadə edib azarkeşlərə təşəkkürümü bildirmək istəyirəm. Stadionun 50 faizindən çox hissəsi dolmuşdu. Bu arena şəhərə o qədər də yaxın deyil. Buna baxmayaraq, azarkeşlərimiz görüşə gəldi. Onların hamısına minnətdarlığımı bildirirəm. Jurnalistlər də sağ olsun ki, vaxtlarını ayırıb görüşü işıqlandırmaq üçün gəldilər. Lakin təəssüf ki, nəticə ürəkaçan olmadı.

- Jurnalistlərlə ilk görüşünüzdə demişdiz ki, şahmatla məşğul olmusuz. Bu qrupda evdə estonları məğlub edə bilmiriksə, kimisə mat etmək potensialımız var?
- Qrupumuza baxanda reallıqla danışmalıyıq. Rəqiblər bəlli olandan sonra çıxıb desəydik ki, 1-ci və ya 2-ci yer üçün oynayırıq, hər birimiz üçün qeyri-səmimi olardı. Estoniya Belçika, İsveç, Avstriya ilə müqayisədə bir az münasib rəqib idi. Lakin estonları məğlub edə bilmədik. Görünən odu ki, qrupda ilk üç yer uğrunda mübarizə apara bilməyəcəyik. Oynayırıq, əslində. Nəticələrdən belə görünür ki, çox çətin olacaq.

- Nazir və digər rəsmilər görüşdən sonra stadionu dərhal tərk etdilər. İcraiyyə Komitəsinin üzvləri isə 51 dəqiqədən sonra. Sirr deyilsə, nə haqda söhbət etdiz?
- Oyunun nəticəsi ilə bağlı müzakirələr idi.

- Oyundan sonra mətbuat konfransında Canni de Byazi dedi ki, məni qovmasalar, müqaviləmin sonuna kimi getməyəcəm. İtaliyalının İcraiyyə Komitəsi tərəfindən göndərilməsi üçün nə baş verməlidi?
- Bu, bir az çətin sualdı. Mənim baş katib səlahiyyətlərimi aşır. Oyun təzə bitib. Bu məsələ ilə bağlı İcraiyyə Komitəsinin üzvləri müəyyən fikir mübadiləsi aparacaq. Bundan sonra qərar veriləcək ki, De Byazi ilə yola davam edilsin, ya yox. Özünün də bildirdiyi kimi, noyabrın sonuna kimi müqaviləsi var. Burda bəzi amilləri də nəzərə almaq lazımdı. Həm baş məşqçinin müqaviləsi var, həm də müəyyən şanslarımız qalır. Millətlər Liqasında pley-off oynamaq ehtimalımız var. Əlbəttə ki, bu çox real olmayan şanslardı. Milli komanda nəticələr əldə etməlidi ki, biz önə gedə bilək.

- İcraiyyə Komitəsinin son iclasında sürpriz qərarlar oldu. Məsələn, İmişlidə 2 peşəkar klub fəaliyyət göstərəcək. Lakin Lənkərandan 1-ci və ya 2-ci diviziona komanda buraxılmadı. Özünüz də bildirmişdiz ki, infrastruktura fikir verəcəksiz. Bəs Lənkərandan niyə peşəkar liqalarda komanda olmadı?
- İmişlidə 2 komandanın fəaliyyət göstərməsi orda stadionun mövcudluğu ilə bağlıdı. İki kollektiv 1 arenada oynayacaq. Bundan əlavə, İmişli futbol bölgəsidi. Orda 2 komandanın olması yaxşı qarşılanır. Cənub zonasından isə Lerikdə peşəkar kollektivin formalaşmasına qərar verdik. Ola bilər ki, bundan sonra müəyyən illərdə digər komandalara da şans yaradılsın.

- İlqar Qurbanov yığmanın əsas meneceridi. O, dəfələrlə Canni de Byaziyə Emin Mustafayevin xidmətini təklif edib. AFFA-nın məqsədi ancaq futbolun inkişaf etdirməsi yollarını axtarmaq deyil. Ölkədə və kənarda olan azərbaycanlı futbolçuların axtarılması da prioritetlərdəndi. Emil Mustafayevin yığmaya çağrılmamasının səbəbi nədi? Belə prespektivli futbolçunun sonda Ukrayna yığmasını seçməsi faciə sayılmayacaq?
- Bu, daha çox texniki sualdı. Sualı De Byaziya ünvanlasaz, daha doğru olar. Onun fikirlərini eşitmək daha məqsədə uyğun olar.

İLKİN SULTANLI