Misli premyer-liqasının 2022/23 mövsümünün qalibi olan “Qarabağ”ın üzvü Redon Cicanın “Football-plus.az”a müsahibəsi.

- Ağdam təmsilçisinin heyətində ilk ilində çempion olduz. Hansı hissləri keçirirsən?
- Çox xoşbəxtəm. Çempion olduq. Ümid edirəm ki, növbəti mövsüm eyni uğuru təkrarlayacağıq. Buna səmimi qəlbdən inanıram.

- Son turda “Turan Tovuz”a 3:1 hesabı ilə qalib gəldiz. İlk qolun müəllifi oldun. Bu, premyer-liqada fərqləndiyin ilk qarşılaşma idi...
- Mənim üçün sevindirici məqamdı. Üzülürəm ki, az qol vurdum. Mövsüm başa çatdı. Qarşıdakı “futbol ili”ndə daha çox fərqlənməyə çalışacam. Ümid edirəm ki, bu, məndə alınacaq.

- Musa ilə Ramil ümümilikdə 43 qol vurdu. Onlar həm çempionatın, həm də “Qarabağ”ın bombardiri oldu. Nəzərə alaq ki, Şeydayev komandanı tərk edir. Növbəti mövsüm “Qarabağ”ın bombardiri ola biləcəksən?
- Əlbəttə. Bunun üçün mütəmadi olaraq oynamalıyam. Belə olab halda çoxlu qol şansım olacaq. Əlimə düşəcək bütün imkanlardan yararlanmağa çalışacam. Özümə güvənirəm. İnanıram ki, növbəti mövsüm daha çox qol vuracam.

- Qurban Qurbanov səni 3 mövqedə oynadır: sağ və sol cinah vingeri, hücumçu. Hansında özünü rahat hiss edirsən?
- Əsas mövqeyim yarımmüdafiənin sol cinahıdı. Amma həm mərkəz, həm ikinci hücumçu, həm də sağda vinger kimi oynaya bilirəm. Lakin harda oynayacağım baş məşqçinin qərarından asılıdı. Əsas odu ki, şans əldə edim. Qurban Qurbanov harda məsələhət bilsə, orda da oynamağa hazıram.

- Albaniya çempionatının bombardiri kimi “Qarabağ”a transfer oldun. İki ölkənin çempionatında hansı fərqliliklər var?
- Azərbaycan premyer-liqasında daha sürətli futbol sərgiləyirlər. Bunun üçün çoxlu güc tələb olunur. Albaniyada belə deyil. Bura çox fərqlidi. Artıq premyer-liqaya uyğunlaşmışam. Düşünürəm ki, növbəti mövsüm özümü daha rahat hiss edəcəm. Vurduğum qollarla azarkeşlərimizi sevindirəcəm.

- Qarşıdakı sizi Çempionlar Liqasının təsnifat mərhələsinin oyunları gözləyir. Bu turnirdə hədəfiniz nədi?
- Əlbəttə, qrup mərhələsinə vəsiqə qazanmaq istəyirik. Komanda olaraq bu hədəfə çatmaq arzusundayıq. Ümid edirəm ki, Çempionlar Liqasındakı oyunlarımızda çoxlu qollar vuraraq “Qarabağ”a fayda verəcəm.

İLKİN SULTANLI