Superliqanın ən məhsuldar yerli oyunçusunun gələcəyi qeyri-müəyyəndi
Türkiyə çempionatında mövsümün ən məhsuldar yerli oyunçusu statusunda olan “Ümraniyəspor”lu Umut Nayır haqqında gəzən transfer şayiələrinə münasibət bildirib.
Əslində 29 yaşlı forvard hələ 2018-də “Ankaraspor”dan “Beşiktaş”a transfer olunarkən ön plana çıxmışdı. Amma onun İstanbul nəhəngindəki karyerası o qədər də parlaq alınmamışdı.
"Football-plus.az" xəbər verir ki, Umut daha sonra “Bursaspor”, “Hayduk”, “Girəsunspor”, “Eyupspor”un şərəfini qorumuş və ötən yay “Ümraniyəspor”a keçmişdi.
Onun debütantın heyətində bu qədər parlaq oyun sərgiləyəcəyini az adam gözləyirdi. Təcrübəli futbolçu bu mövsüm 27 superliqa oyununda 15 qol, 3 məhsuldar ötürməlik performans sərgiləyib. Onun bu yüksəlişi Türkiyə yığmasının baş məşqçisi Ştefan Kuntsun da diqqətindən qaçmadı. Nayır martda Ermənistan və Xorvatiyaya qarşı oyunlarda sonradan meydana çıxaraq yığmada da debüt etdi. “Ümraniyəspor”da icarə əsasında oynayan futbolçunun bu yay iddialı kluba keçəcəyi gözlənilir. “Beşiktaş”ın yenidən ona maraq göstərməsi haqda şayiələr yayılıb.
Umut türkiyəli həmkarlarımıza açıqlama verərək bunları deyib: “Böyük komandada oynamaq arzusu ilə yaşayan futbolçulardan deyiləm. Çünki artıq bu təcrübəni yaşamışam.
“Beşiktaş”da gözəl günlərim keçdi. O kluba qarşı olan hisslərimi hər kəs bilir. Rəsmi təklif olsa, onda bu haqda danışaram. Şəxsi planda mövsüm mənim üçün gözlədiyimdən də uğurlu keçir. Bu mövsüm mənə yığmada oynamaq da qismət oldu. Əsas arzularımdan birini həyata keçirdim. Ona görə də çox xoşbəxtəm. Amma daimi olaraq yığmaya dəvət almaq üçün sabit oynamalıyam. “Ümraniyəspor”a gəlincə, pillə-pillə irəliləməyə çalışacağıq. Tez-tez turnir cədvəlində mümkün variantları müzakirə edirik. Təəssüf ki, elitada qalmaq şansızımız çox deyil. Xal itirmək limitimiz tükənib. Mən ötən mövsüm “Girəsunspor”da da pis çıxış etməmişdim. “Ümraniyəspor”da yüksəlişimi davam etdirirəm. Artıq daha təcrübəliyəm və ildən-ilə oyunuma yeni özəlliklər qatmağa çalışıram.
Türkiyədə hücum oyunçususansa və bir balaca özünü göstərdinsə, dərhal adın transferdə hallanmağa başlayır. Amma indi əsas diqqətimi klubuma yardım etməyə yönəltmişəm. Müqavilə ilə “Eyupspor”a məxsusam. Onların mənimlə bağlı planlarından, superliqaya yüksəlib-yüksəlməyəcəklərindən də çox şey asılı olacaq. Amma indi heç nə dəqiq deyil”.
Digər xəbərlər
